萬事不由人計較 一生都係命安排
【文／何石松】
發音人：何石松（海陸腔）
孔子識講過，「五十歲愛知天命」，所謂天命，就係大自然介規律，春夏秋冬介變化，富貴窮通介定數，日夜陰陽介循環，一切大自然介道理，毋係人力可以改變介，吾俚必須順應天理來做事情，毋好認為別人摎自家介想法無共樣，就硬硬想愛改變對方介想法，甚至不顧對對方介幸福摎生死，使出千般力，計較到底，結果，還係刀切甕菜兩頭空，正經係「萬事不由人計較，一切都係命安排。」
這句話介意思，主要還係愛煞猛打拚，盡人事，聽天命，毋好去摎人計較，因為，天有不測風雲，人有旦夕禍福，時來可以風送滕王閣，運去共樣可以雷打薦福碑，這還係小可，看該人生幾多不相同，平平係人，斯有石崇豪富范丹窮，運早甘羅晚太公；彭祖壽高顏回短，六人全在五行中。有人工廠兩三間，到頭來險險橫淨淨，有人戇戆當當，苦到屙痢肚，包尾還係能夠妻賢子孝，萬貫家財，人生各各自不同，這個命運還係愛想通。
聽講頭擺有個財主，安到張百萬。佢有三個妹仔，兩隻大妹仔全部嫁分有錢人，斯伸三千金還吂嫁。一日，張百萬行到花園尞，想著自家一生人，恁打拚，賺恁多錢，斯暢到耐毋得，認為自家介成功，完全係自家煞猛，正有今日介成就，斯在涼亭脣，寫上「萬事由人」四隻大字。
無想著，佢第三個妹仔，看著這四隻大字，當無歡喜，黏皮摎佢改做「萬事由天」，等到厥爸知係妹仔改介以後，閼到話都講毋出，斯摎厥妹仔捉來問，仰愛改阿爸介字。兩儕斯因為到底由人，抑係由天，嗄吵起來，為著這件事，厥爸盡傷心，無想著恁惜介妹仔，恁樣來堵佢，堵到佢火當著，好啊，愛由天就由天，亻厓就摎你嫁分一隻又戆又苦介人，看你還有辦法由天無？
佢就喊家僮仔，去尋一隻世界上等戆等苦，又律律不不，毋知人我，講話又毋正介來分佢做老公。該隻人就係李不直，屋下當苦，斯一間茅寮，逐日靠釣蛤蟆過日仔，有一餐無一餐介，又著著衣衫襤褸，爛之爛擐，生活艱辛，盡多人看佢毋起，無想著恁有錢介張百萬，還送一隻靚餔娘分佢。著也毋著？佢還無愛呢，三請四拜託，佢正刻耐仔接受，正經係「戆人有戆福。」
日仔無停梭介，一日一日過去，人講「毋驚屋下窮，斯愛餔娘好笑容」，李不直在餔娘介幫忙之下，生活也已做得。有一日，照常去釣蛤蟆，旋風之間，看著一條兔仔，飆到伯公下介窿肚去，佢就爬落去想愛捉，兔仔無捉著，嗄看著裡背有一大堆介金條，佢就拈到袋肚去，張到淰唸，正出來。
佢心肝肚當暢，該載唷，有恁多金條，從此以後，過日仔斯毋使愁咧。想愛摎金條背起來，愛轉介時節，金仔嗄斯伸兩條定定，佢試著奇怪，又倒轉去拈到淰淰，共樣，愛轉時節，還係伸到兩條，佢感覺奇怪，就去問伯公。
伯公講，這毋係你介金仔，這係李門環介，斯愛你去尋李門環來，這兜金仔斯全部係你兜介咧。李不直滿天下去尋，也尋無李門環這隻人。恁堵好，不直降徠仔咧，厥餔娘背等嬰兒轉外家。姐公當惜，攬在手上，嗄噭起來，姐公無結煞，斯用門環去拐佢，無想著，嗄毋會噭咧，姐公斯摎佢安到李門環。兩公婆聽著當歡喜，遽遽斯去伯公下，用李門環介名義張金條，堆到屋下淰淰。
過無幾久，丈人老做生日，三姊妹前去祝壽。兩個姊丈毋知不直已經係大財主咧，毋係嫌佢苦，就係笑佢祝壽禮金都無，斯蛤蟆田螺定定。還䁯佢講，這下景氣毋好，亻厓兩儕介工廠愛賣，亻厓半價賣分你，看你有才調買無？係無，你斯到亻厓屋下做奴才一生人，看你敢無？無想著，李不直全部答應，還簽下契約，一下仔，兩個姊丈嗄戆忒，丈人老也無想著，摎妹仔嫁分又戆又苦介人，佢兩公婆仰會變恁有錢？
到底係萬事由人，抑係由天，正經係「萬事不由人計較，一生都係命安排」，看來，大家不妨共下「腳著拖鞋――毋使㬹（爭）」啊！
※此處的「介」為大眾通用的「的」，同教育部訂的「个」之意。
