臨暗：都會人个客家鄉愁
【文、圖∕廖經庭∕國立中央大學客家社會研究所碩士】
桃園係臺灣客家人最多个縣市，客家人有七十八萬人，中壢摎平鎮又係南桃園客家人盡多个兩個行政區，所以在臺灣客家地區，中壢摎平鎮有重要个地位。
毋過中央大學客家政治經濟研究所第一屆研究生范佐勤在佢碩士論文有講過，在臺灣客家人口盡多个中壢，中壢个客家人乜有學老化个現象，這摎客家話難了解、難學、族群通婚、大家普遍用臺灣社會个流行語言─學老話有關係，所以毋會說客家話个客家人乜緊來緊多。
讀研究所，亻厓就戴中壢摎平鎮有二十年了，這乜係亻厓个第二個胞衣跡，亻厓對中壢摎平鎮一帶个端詳，乜像范佐勤學弟在論文講个，這位明明就係客家鄉鎮，毋過會發現客家話抑客家意象毋係想像恁多，所以行到街路頭總係想聽看仔客家話，尋看仔客家意象，在平鎮聽著客家話个時節，就係亻厓戴个黃里長廣播時，佢總會先用官話廣播一遍，客家話過講一遍，所以逐擺里長廣播時，亻厓總係細義聽等黃里長講客家話。
買東西个時節，亻厓乜長透猜想頭家摎頭家娘會係客家人，在中壢摎平鎮一帶，其實有盡多个客家人，毋過係大家平常都毋講客家話，摎客家囥起來了。有一擺，亻厓到龍岡圓環个七里香買烤肉，聽著頭家摎頭家娘用海陸客家話打嘴鼓，這時亻厓乜盡歡喜摎頭家講客家話。
恐驚亻厓兜戴在都會个客家人有這種个感覺吧？客家話在臨暗个時節，都會个客家人平常講官話，毋過身體肚个「客家魂」無毋見忒，亻厓兜長透特別囥起來客家腔調，毋過長透無意間講出客家腔个官話，就像「湖口」變成「福口」、「花蓮」變成「發蓮」、「魷魚」變成「魷移」， 亻厓兜意識到客家腔走出來時，亻厓兜長透會緊笑，毋過心肝肚乜會出現淰淰个鄉愁，恐驚亻厓兜个身體有一個「客家魂」！
◎延伸閱讀：范佐勤，《中壢客家的福佬化現象與客家認同之研究》（桃園：國立中央大學客家政治經濟研究所碩士論文，2008）
