「哆啦A夢」係客家貓个論證
【圖／李岳哲；文／賴維凱／國立中央大學客家語文暨社會科學學系助理教授】
發音人：賴維凱（南四縣腔））
一、前言
「哆啦A夢」係盡受歡迎个卡通，原旦係漫畫，下後拍做電視、電影，客家電視臺每禮拜六暗晡9點都有客語版，根據崖恁多年來个觀察，在這大膽提出日本个「哆啦A夢」，實際上係一隻「客家貓」。以下有5個理由來證明崖个論點。
論證一：徐福去日本
秦始皇想愛長生不老，命令徐福帶3千個細倈仔、細妹仔去渤海尋神仙討靈丹，結果藥仔無尋著嗄毋敢歸，漂流到日本，就恁仔在該定貼，這下日本還盡多徐福个神像，故所矮㑁㑁个「哆啦A夢」，盡有可能係該兜童男童女帶過去个。
論證二：好著大襟衫
「哆啦A夢」著个衫係青色个，就係崖等這下講个「大襟衫」、「藍衫」，這種衫係「勤儉持家」个代表，在故事裡背，佢總係扮演正派个角色，雖然每擺同大雄扌帣手都失敗，毋過盡遽又恢復堅強，繼續拚下去，這毋係就「客家精神」咩？
論證三：蓋驚老鼠仔
「哆啦A夢」雖然係貓仔，照理來講，扭老鼠仔係厥本分，毋過佢嶄然驚老鼠仔，毋係因為佢分老鼠仔齧過耳公仔(而已)，係因為客人有「閩西八大乾」之一─寧化老鼠乾，佢係驚老鼠仔个後代來報冤仇，故所一等仔驚老鼠仔來尋佢。
論證四：好食銅鑼燒
「哆啦A夢」好食「銅鑼燒」係大家人知得个，毋過就崖所知，佢係想念臺灣个客家後代，正會好上這點心，「銅鑼燒」，諧音「愁銅鑼」，講著苗栗「銅鑼」，聚概人會愐著「客家」，過，這種點心熱量蓋足，食吔愛做事，乜盡堵好。
論證五：口ㄤ〜口ㄤ〜口ㄤ〜
「哆啦A夢」主題曲有一句大家都會唱个：「口ㄤ〜口ㄤ〜口ㄤ〜崖最好哆啦A夢」，「口ㄤ」就係「口ㄤ過」，係「還有、還過」个意思。翻做客話，就係「還過〜還過〜還過〜，崖最好哆啦A夢」，這係客話裡背盡重要个特殊語法。(賴維凱，2016)
結論
以上論證：純屬虛構、屙膿滑血、不褡不膝，多謝大家。
