中央大學電子報

久見个e-mail

【文、圖∕徐佳妤∕臺北市客語支援教師】

　　 收著這封e-mail，崖，噭眵咧。

　　 記得舊年十月，接著《文學客家》个邀稿，主題係：「移民˙臺北」，一起勢，實在無靈感，也毋知愛仰仔寫？毋過，先生都開嘴邀稿咧，總愛寫出一篇來。

　　 一日暗晡食夜，同吾爸嗑紅，講起崖等係仰仔搬來臺北个？原在，弄擺還毋曾歇在這進前，先同阿姑歇，下後在樹林租屋仔，落尾又同阿姨稅屋仔，該時崖還細，就跈等大人儕徙來徙去，乜毋知做麼个緊搬屋，等過大吔漸漸仔正知：爺哀對屏東上來臺北打拚，無挾著麼个錢，只好等買負擔過輕个國宅，阿爸定定仔講出這段故事个量時，嗄分崖愐起另外一個人......。

　　 記得讀板橋國小三年生个時節，堵著一個溫柔、耐心又性體蓋好个導師，佢會在當畫歇睏時，歕口琴分學生仔聽，聽等悠揚个口琴聲，全班蠕蠕動个心，黏時恬靜下來。這琴聲分崖徙來徙去个心，有了一隻安定个力量，溫暖了他鄉來个細人仔，這，先生个名仔，深深印在吾心肚。

　　 一時興頭來，崖在面書項尋先生个名仔，正知今嘎佢係一間教育大學个副校長，寫了一封e-mail禮貌个問：「......係毋係當年教崖个先生？」崖想：副校長恁無閒，驚怕毋會回e-mail咧，毋知過了幾久，打開電子信箱，無想著，副校長正式係當年个先生！翻想這幾年，自家經歷了人生重大个變化，副校長親切个問候，分崖感動到目汁濫串。神奇个係，副校長講，前幾日正同厥姐仔講著，在板橋國小教書个日仔，恁堵好，就收著吾个e-mail。記得當時，先生淨教崖等短短个半學期，就去做兵咧，大家都盡毋盼得，毋過，先生歕个其中一條民謠《紅河谷Red River Valley》，經過四十零年咧，仰，還毋會添放核呢？

　　 童年个記憶，有一個口琴聲，這聲，永遠會放在吾心肝頭，燒──暖。

　　 嗑紅：音gab fungˇ；南四縣講法，和「打嘴鼓」、「譫哆」意思一樣，指聊天。
　　 挾:：音hiabˋ；有「存」、「藏」的意思，本文指「存」。