大自在工作室
【文、圖∕薛常威∕國立中央大學客家語文暨社會科學學系在職專班碩士】
發音人：薛常威（四縣腔）
新竹關西个石店子老街，日本時代係當發展个所在，毋過摎當多客庄共樣，背尾變到盡落後、盡恬靜。這幾年經過新竹縣政府摎關西在地人个努力打拚，越來越多个後生人來到這位開店做生理，這下短短个一條路開了當多特別个店仔，像「石店子69有機書店」、「初心者市集」、「關西實驗生活」，嗄變成當生趣好尞个一條老街。
這位乜有一間做植物染个「大自在工作室」，店頭家係對鐵路局退休个公務員，頭家娘曾秀寶原來係公司上班个人，辭忒頭路以後，開始做自家有興趣个植物染，2007年成立工作室，因為欣賞莊子逍遙自在个觀念，故所摎這間店仔安到「大自在」。一開始佢兜係在新竹市集擺攤，產品愛搬來搬去，乜盡麻煩。故所在關西石店子這位尋著一間有天井做得曬布个老屋，2016年徙到這位，正正經開始有自家个店面。三十年無人戴个老屋，盡舊，又屙糟，全部係靠自家慢慢仔洗過，清過，正做得順利做生理。
「大自在工作室」个宗旨係用天然、環保个材料，做出各項个生活用品，強調材質个溫暖摎手作个質感，分人客使用个時節，做得感受身心自在摎綠色生活个美感。用棉、麻、絲、毛等天然个材料，摎關西在地个植物來做染材，做出各項包仔、頸圍仔、手帕、桌墊、衫褲、掛飾各樣个生活用品。雖然當費工，大自在个植物染堅持用一道道手作个程序來維持好个品質，「植物染係有生命个鮮花，化學染係塑膠花」。
自進駐石店子个老屋以後，染布、製作摎販售產品開始做得共下完成，創造出一隻典雅懷舊个空間，大自在無定期會舉辦各項个植物染體驗課程，非常合適全家大小共下來尞，係有機會來到關西，一定記得來這「大自在」行尞。
