老狗屎就係文化
【文／羅肇錦∕國立中央大學客家語文暨社會科學學系榮譽教授】
發音人：羅肇錦（四縣腔）
客話失落嚴重，大家愁到強強會癲忒。故所當多人提出愛趕遽搶救客話，就愛用簡單好學，又同國語差毋多个客話來教細人仔，細人仔正會有興頭學客話。絕對毋好拿過時个老狗屎做教材，浪費時間又了伙食。毋故吾个看法堵堵相反，愛傳承客家文化就愛重視老狗屎，愛研究客家歷史就愛了解老狗屎，愛傳承文化就愛保留這兜老狗屎，無定這兜老狗屎下二擺會變黃金，會變歷史文化連線个鎖匙。
以崖個人个研究，恁多年來，提出「貉獠係客家祖先歇在嶺南个稱呼」，根據唐朝六祖慧能分五祖弘忍指等佢講「嶺南貉獠人也」，恁堵好二十零年前，有人調查出廣東羅浮增城一帶个瑤族（也係畲族）到今晡日都還稱自家「活聶」，係「山人」个意思。到今晡日羅浮該位人全部講佢兜係客人。這個文獻紀錄，加上《唐史南蠻傳》講「山謂之和，谷謂之浪」這三個紀載，就做得證明客人祖先係歇在嶺南一帶个山地（也就係畲瑤根據地─蓮花山脈同羅浮山脈之間），這附近其他族群个人稱呼佢「山人」。自唐以來，就有「和蠻」「貉獠」「活聶」這兜稱呼。恁長个時期肚項，使用个漢字，不管「和」「貉」「活」抑係「蠻」「獠」「聶」拿來同中古音、瑤族話、客家話比對，「和」「貉」「活」就係「山」（音近ho 或ha）个意思，「蠻」「獠」「聶」就係「人」（音近lo 或ne）个意思。
加上今晡日海外各地个人，淨講潮州人安到「貉獠」（ho lo），其他漳州、泉州、福州人就無講佢係「貉獠」（ho lo）。可見「貉獠」（ho lo）係專門對嶺南人个稱呼。客家人盡主要个根據地堵好乜在嶺南，三山國王信仰主要地區也係嶺南个潮州一帶。
崖敢提出恁惹人个論點，完全係古書舊族名這兜老狗屎分崖个養分，還過崖又比對分析出，老狗屎客話「孤老」「死老」「貉獠」个lo係「人」个意思，崖正有辦法尋出「客」（音近ho 或ha）係「山」个意思，結論「客人」就係歇在嶺南个「山人」个意思。另外像「翁菜」同「空心菜」，老狗屎菜名「翁菜」个ong 這隻音，背尾查著係瑤語「水」个意思，故所地名「翁源」係水源个意思，翁姓大部分係客人，也就係瑤族轉化過來个人。像這兜老狗屎，做得拿來證明客家歷史个例仔哪就淨係，崖就講這兩隻較特別，大家較毋會想著个老古董來分大家看。
另外客話肚異多音義差別當大，但係因為國語共音，慢慢仔客話也變到兩隻字混雜亂用，有兜人就講，莫恁老狗屎哪，請裁用，方便看得識就做得。崖堵堵相反，崖想老狗屎个讀音，定著有老狗屎个意義，做毋得搞差。像「做」同「作」兩隻字，國語共音，客話一個讀zo，一個讀 zogˋ，做毋得混雜。恁樣正有法度了解「做正來」係做畀正，無好歪忒个意思；「作正來」係愛管作修正到正確清楚；「做家」係講勤儉煞猛持家，「作家」文字創作个專家；「做壁」係建造一扇牆壁，「作弊」係考試用無正當个方式去考。比將「細人仔還細就愛作畀正」，做毋得用「捉人」个「捉」，「作石駁」「作燥來」「抓作」也做毋得用「做」字來混雜用。
講到這，崖想大家就做得了解，客話當多老狗屎係當有文化價值个東西，拜託傳承客家文化个人，毋好亂豁你還認得識个老狗屎。
