看得著个愛戀
【圖／李岳哲；文／邱一帆／國立中央大學客家語文暨社會科學學系客家研究博士班】
發音人：邱一帆（四縣腔）
古典玫瑰園裡肚个花
對你个頸根起勢
一蕊一蕊綻放
浪漫个情意
毋知過吔幾久
順等藤枝在凸出个肚屎面項
乜三蕊三蕊開出
愛愛愛平方个玫瑰花
連下半身乜係，還有
該下背講毋出名仔个所在
共樣鑲等生纏死纏个愛戀
可能亻厓描寫个順序顛倒
毋過這係正經
你就凈係一支電話
無想著主人同你恁樣打扮
葫蘆抑係神燈樣个形投
搣到你像對中世紀行出來个
古典風雅
想愛同你行兼
又有兜仔驚驚仔
驚怕分你看著吾个俗同朳朳仔
想著該時
吾手就伸在你个脣頭
嗄毋敢偎兼
無想著現實个距離
做得同人隔到天西恁遠
心肚个愛戀
目珠做得看到恁真
