中央大學電子報

處處引燈處處溫情（中）──懷念古國順教授

【文、圖／鍾榮富／南臺科技大學應用英語系講座教授】

　　 有一日，在客委會開會之後，行出中油大樓，古老師特別邀𠊎去台北市政府站對面个「金礦咖啡」坐，問𠊎書修改到仰般，做得拿去五南出版無。該央時，𠊎還在徬徨，毋知那間出版社願意出客家个書。古老師个關心，堵好解決了𠊎个問題，同時也種下五南出版社同𠊎个因緣，後來𠊎寫个「當代語言學概論」(到今已經出了12刷)也委託五南出版。如今愐來，古老師該日个咖啡，實在係出於「拔刀相助」，完全了解𠊎个苦境，佢个添手毋想讓𠊎有心理負擔，親像林如海幫忙賈語村共樣，表面上還係客客氣氣拜託𠊎將書送去五南，內肚中其實想係知𠊎困境，全心想愛幫助𠊎。

　　 古老師向來外表樸實像村農，話毋多，但係心肚對客人對客話有十分个堅持。客委會成立之初，當時个莊錦華副主委身負客語重建、推廣、傳承、書寫等等重任，輒常愛召集客籍學者開各種會議，主題都同客話有關，古老師就像一盞明燈，無論大小事情，佢都愛斟酌參與，反覆討論。由於各種客話个腔調有別，語詞不見得相同，發音差別異大。當時每儕對別腔个認識毋深，往往根據自家个腔調，大聲詏事，每一擺會議个時間都拖到當久。古老師總係耐心聆聽，最後發言該時，也係細細聲，慢慢講，毋過佢滿腹經綸，引經據典，每一個語辭，每一種發音，佢都有辦法尋出來源，講出道理，說服大家。如今个客語辭典用詞、標音、書寫同分級，大概就恁樣仔產生个。當然，到今還係有盡多語辭、發音、書寫無辦法統一，但係古老師已經開了這條大路，以後个學者在會議桌上，總會達成共識。

　　 亻厓在高師大英語系服務，教个科目同研究專長偏向語音理論。古老師身為台北市立教育大學中國語文系个創辦人，兩儕除了客家之外，本來無麻个交集。毋過，𠊎在1991年受聘去教育部國語推行委員會擔任委員，委員之中大部分都係國學深厚个長者前輩，佢兜對𠊎盡友善，往往以身教示範，使𠊎得益匪淺。其中，李殿魁教授同古老師為平輩至交。在高鐵運作以前，𠊎來台北開會歸高雄，都愛去松山機場坐飛機。有一日，𠊎愛去機場个路上，堵到李教授同古老師，𠊎搶快行前去打招呼，毋知仰仔講，三儕決定去附近个飯店用餐。古老師一兩杯麥酒定定，李教授同𠊎有去金門同當地个中小學校長鬪酒个情感，飲起酒來，麻个都拋到九層天之外了。該日，三儕對黃昏飲到最後一班歸高雄个班機，正在賓主盡歡之下，互相道再見。自古配酒最好个就係話。𠊎係晚輩，毋敢多講，李教授同古老師个話題，從古詩詞、古經典、戲曲到電影，𠊎親像上了一堂難得个中國文學課。古老師同李教授都係性情中人，兩儕一搭一唱，李教授真仔就起身唱起來，有板有樣，連平常看起來古樸个古老師也開懷大樂。該日可能係𠊎認識古老師到今，印象中佢最得意滿足个樣仔。