八月半个石斑仔
【文／黃美貞／光復國小教師】
發音人：黃美貞（四縣腔）
看等五十歲就愛來哩！老公開个會計師事務所也穩定成長，做得安排兜仔休閒活動分自家放尞。有一日，佢𢫦𢫦風同大家講：「佢愛去海項釣魚仔！」吾心肝肚想，海恁闊愛對哪釣起勢，愛坐漁船出海，驚怕風浪大，會發生危險，係釣著大魚仔乜愛費大精神，釣得起來斯無恁該。還係運氣好，做得釣淰淰个萋魚仔，講實在話，做餔娘个除忒愁慮還係愁慮。
第一擺出海，講實在話，正經係罅擺，暢若若仔準備愛用著个裝備，打早䟘床食朝，無想著一上船就頭暈腦疺，食落肚个東西翻淨淨，莫講釣着麼个魚仔，連轉到屋下，坐在膨凳項就試著屋仔緊搖，像係有地動樣仔。恅著老公怕會驚著，無敢去釣魚哩！無想著過欸半隻月，佢又講愛去出海了。這擺，佢特別食一種日本製个兔仔牌暈船藥，三更半夜就出發，三不五時還傳相片分𠊎報平安。在吾个想法裡肚，海釣个人應該會共下參詳，結果係各顧各，顧自家个魚線浮胖仔，係有停動黏時就愛有行動，麼人有閒在該打嘴鼓呢？雖然講釣魚仔做得交朋友，但係大家花歸日仔个時間同幾下千銀，重點還係愛釣著大魚仔。
因爭自家釣个魚仔毋比得市場買个，魚鱗刮到淨淨、腸肚撈到好好，買轉來就做得落鑊，故所，頭下碼，老公敗勢講愛帶魚仔轉屋下，後來，技術緊來緊好，做餔娘个就愛用行動來支持厥个煞猛，記得愛釣兩條大魚仔分𠊎煮魚湯哦！佢斯當沙鼻，會同屋下人紹介，恁久有麼个魚仔，大家乜會許願想食麼个魚仔，比將講：花枝、石斑仔、大黃魚。
這擺出海係八月半頭兩日仔，老公坐歸朝晨仔，斯麼个就無釣著，魚箱仔打開來光匱匱仔，毋過，釣魚仔吂到收釣梹，毋知輸贏，無人敢拍胸脯保證。無想著，臨晝邊仔，佢暢蹀蹀仔傳來一張同石斑仔个合影，船主當說佢，講佢係今晡日个頭名，還愛翕相傳上去網頁，佢講：「有值有值！𠊎做得收釣梹轉屋哩！」
其實，老公從細到大就毋好食魚仔，毋過，佢試著等魚仔个耐心，同釣著个歡喜，係一種當特別个享受。到底該條石斑仔去哪仔呢？係𠊎坐高鐵拿等裝冰矻个袋仔，直接送去妹家，同阿爸、阿哥共下食這條難得个好料仔，該清甜个味緒同韌韌个口感，好食著連舌嫲就會吞落去！今年个八月半打鬥敘，因為有這條野生个石斑仔，故所有一種特別無共樣个海味！
