敗家子
【文／薛常威／國立中央大學客家語文暨社會科學學系在職專班碩士生
薛常威 聲檔 — 吉林茶園（四縣腔）
客家戲曲故事中典型的壞人物之一就是「敗家子」。這段影片是客家戲曲「丁蘭刻木」的片段，改編自《二十四孝》裏的「刻木事親」，丁蘭年輕時並不孝順，對父親及後母親極為不孝。年輕時呃丁蘭就是個「敗家子」，不孝，不敬重長輩，嫖賭，花天酒地。這類典型的壞人物讓觀戲者深深厭惡，他們最後的下場不是很淒慘，就是到劇情的最後突然大澈大悟，痛改前非。唯有如此才能符合善良百姓的價值觀，並安慰一般人的心靈。
丁康：做麼个東西？
丁蘭：𠊎轉來啦。
丁康：你仰會恁不受教得著。走到屋下項，這兩位就係你阿爸阿姆所坐，你憑麼个東西摎你个二哀𢱤在旁邊，你恁咧像麼个體統啊。
丁蘭：麼个二哀啊？該𠊎姆早早就往生了，該斯後來你正討个後來妾，𠊎無承認佢係𠊎个二哀。
丁康：你無承認啊，枉費啊枉費，枉費阿爸辛辛苦苦分你勤讀聖賢，佢若毋係你个二哀來講，佢係你个上輩人，你應該愛敬老尊賢正著。話過講到轉來，阿哥跟過就係嫂，阿爸跟過就係阿姆。
丁蘭：好了好了。老仔啊，𠊎毋係逐日聽你到該講經說道，𠊎盡無閒，𠊎頭路做當大，𠊎滿哪仔就係𠊎个好朋友，𠊎愛投資做生理。錢拿來。
丁康：你憑麼个資格摎𠊎拿錢。
丁蘭：呦，𠊎仰會無麼个資格摎你拿錢。𠊎係丁家个大少爺呢，下二擺，你若往生以後，所有个家財萬貫全部係𠊎丁蘭一个。
丁康：講來講去，原來你盼望个思想，你就望𠊎早早死，家財總下你愛占忒係無？
丁蘭：𠊎斯無恁樣形講喔。
丁康：丁蘭，你方才就講忒了。下二擺𠊎若死，財產也係全部你个。
丁蘭：該早慢个事情啊。
丁康：你毋好太早在該作夢啦。你若有賺分𠊎，𠊎若死交分你。你若一點半息無歸轉，𠊎一錢半角𠊎就無留分你。
丁蘭：轉來摎你拿錢，聲聲句句就無愛分𠊎錢係無？
丁康：你在外背嫖賭。
丁蘭：𠊎過問你一擺，老猴牯，到底愛分𠊎錢無？
丁康：愛摎𠊎拿錢，一句阿爸个好話就毋曉得講，罵𠊎老猴牯啊，老猴牯哪有錢。
丁蘭：無錢係無，無錢哪，無錢𠊎自家會想辦法，下二擺你若消忒，𠊎毋會插你。
盧氏：吂愛正。
丁蘭：做麼个？
盧氏：丁蘭，你莫摎你爸計較，你爸年紀有恁多。佢斯驚你財產會分人騙忒，來來來，阿姆有錢，阿姆个錢分你。
丁蘭：一息仔定喔？愛拿乜拿較多兜仔，拿這一息仔，食一餐酒就花忒了。𠊎還愛賭徼，仰會罅。
盧氏：省省用啦。
丁蘭：好啦，老猴嬤，看妳恁辛苦照顧𠊎爸，無愛摎妳計較，多少𠊎就收起來。𠊎當無閒，𠊎愛做生理。
盧氏：酒毋好食恁多啊。
丁蘭：閃開啦。
盧氏：員外。
丁康：夫人啊。妳恁樣偷偷撂撂，拿錢分佢，妳當作𠊎無看著這毋係無？
盧氏：毋係恁樣形，後生人本來就較愛用錢，你就莫摎佢計較，佢還後生，毋曉得想，係𠊎想啊，多加幾年，佢曉想就毋會恁形做。
丁康：一日等過一日，一年等過一年，佢這下幾多歲，毋係三歲个孩童，夫人，妳毋好太過縱佢，妳敢無聽河洛人講一句話，「生豬起灶，生子到尾也是不肖啊」。
盧氏：員外，自家个倈仔，莫恁樣講，佢決定就會變好，落來去。
丁康：夫人喊𠊎好好休息，𠊎就丁蘭一個子兒定定，子兒一旦恁不用，事事項項就愛老漢自家𢱤行。𠊎想今晡日天氣恁好，愛出外收租，喊阿清摎𠊎做伴同往。
1.大哀tai55oi24是非元配所生的子女對元配的稱呼，即指父親的大太太而言。二哀ngi55 oi24即後哀heu55oi24是指繼母。
2.𢱤sung31：推，𢱤車仔。
3.後來妾heu55loi11qiab2：妾是指男子的側室。後來妾，正妻後面再取的妻子。
4.阿哥跟過就係嫂，阿爸跟過就係阿姆。跟哥哥在一起的就是嫂子，跟爸爸在一起的就是媽媽。
5.上輩人song55bi55ngin11：長輩，上一輩的人。老輩人lo31bi55ngin11，指老一輩的人。
6.滿哪仔man24nai55e31：到處。
7.插cab2：對別人的言行有所反應，多用於反意。莫插佢，別理會他。
8.一息仔id2xid5e31：一點。
9.賭徼du31gieu31：賭博。
10.偷偷撂撂teu24teu24liab2liab2：暗中做事，不讓別人知道。
