中央大學電子報

罔講笑

【文、圖／彭欽清／國立政治大學退休教授】

　　 原在人日合夜做，共伴仔毋係唱山歌，就係緊做緊講笑，苦中毋作樂，日仔難挨，細倈仔講个總係不褡不膝个較多，故所海陸正會講：一日無講朘，飯食毋落胲；一日無講膣，日頭毋落西。這下這種笑科，人多該下講，怕會食官司哦。

　　 其實日常生活肚項就當多笑科，有个係無聽識別人个話就應，無就講話無詳細斟酌，也有耳聾自有耳聾計个結果，烏白胚想出來个。

　　 苗栗个南苗市場有當多个老人家㧡自家種个菜去賣，阿松伯姆賣个細tomato已好食，大家都搶等買。

　　 阿玉放尞轉苗栗，禮拜日打早就去到市場，想買兜仔上臺北，好同同學分享。無想著，別人比她佢還較早，吂輪著佢就賣淨淨誒。

　　 阿玉想來就來誒，想知老人家仰恁會，種出恁好食个細tomato。就問講：阿伯婆，若tomato係「溫室」个無？ 阿松伯姆聽誒，目珠盯到大嫲粒應講：你講麼个啊？𠊎尿都毋敢淋，還敢”搵屎“。脣項个賣菜伴仔聽著，笑等同阿松伯姆講：你莫恁癲東好無，人係問若tomato係用網仔圍等來種个無，你嗄講到淋屎淋尿該去！

　　 亻厓有一擺轉莊下，同往擺共樣，愛轉臺北該下，車仔个後斗又係大包細包个菜過水果。吾倈仔發等車仔，吾二嫂緊用國語吩咐佢：賢偉，不要駛太快，慢慢駛。無想著賢偉聽欸嗄應講：阿伯姆，不必擔心，我會慢慢駛，不會駛太快，我已經駛了好幾年了。吾二哥聽誒就噥吾二嫂：逐擺同你講同細人仔講客就好，國語佢會輸你喺??

　　 亻厓在美國讀書該兩年，有一个教育系个黃教授係造橋人，兩公婆都係客人，對𠊎盡照顧，已輒請𠊎去厥屋下食飯。

　　 佢講正得著博士學位在大學教書該下，當無閒，厥餔娘又愛上班，無法，就將正出歲無幾久仔个倈仔帶轉台灣請厥姆度。

　　 年零過後，較定貼兜仔，就同厥姆過倈仔接到美國，厥倈仔正學講。有一日，黃教授一家人去同事屋下參加pot luck（一家出一品菜个打鬥敘）。厥細人仔已好嘴斗，盤仔項个東西兩下半就食淨淨，緊講：無。主人聽啊著，遽遽講：You want more? Here you are. （還愛係無？來。）就挾加兜仔東西分佢。一下仔，又聽著細人講：無。主人笑笑講：More? Of course.（還愛哦，來。）又再過同佢加挾加兜仔。

　　 厥婆看著，喊黃教授同大家解析講：在臺灣，厥孫仔見東西食忒了就會講「無」，佢就會挾加兜仔分佢。大家聽誒，就講客話同英文通得哦。

　　 羅肇錦教授兩十年前想買有老屋个農地，做得退休過後歇在該做一個安樂仙。看往轉苗栗幾下個鄉鎮，盡尾買著一垤有田、有園、有老屋个地。

　　 有一日在臺北，一個朋友問佢講：聽講你地買好誒。你買在哪呢？佢隨口應：𠊎買在新雞隆，面前有河壩，背後有山仔，風水罔罔仔。

　　 下擺仔，聽啊仔人同人之間个對話，輒常會聽著言者無心，毋過生趣到孤盲个東西，人生實在趣趣仔哦。