會跳舞个李仔
【文、圖∕彭賢祥∕桃園市客語薪傳師】
發音人：彭賢祥（四縣腔）
鷂婆山下个屋脣，有桂竹園、綠竹、麻竹連共下，係在屋側角，屋後背摎禾埕前面，就種兜李仔，有玉李、水李、紅肉李，過年該央時，李仔園項像起濛沙煙樣仔一片蓬白，摎路脣紅色个山櫻花共下，實在係一幅當靚个畫，看到毋肯放忒！
桂竹筍期正煞，跈等就愛準備摘李仔哩！李仔園項像過正月半樣仔，樹頂高吊燈籠，有黃色、紅色非常个打眼，會好食个李仔會上粉，逐粒李仔像細妹仔打扮樣仔恁靚，驚摸著就會變媸忒，所以頭擺阿爸講：｢李仔愛摘該下，毋好摎粉摸忒，看起來刻靚，正會賣好價數。｣毋過愛摘李仔該下，樹頭下个草排，定著愛用撥鐮也係撥草機，摎草撥淨來，正做得企在樹頭下做事。
李仔期个時節，最先愛摘个係玉李，續下來係水李，包尾个係紅肉李。摘李仔之前，愛看李仔个大細粒來決定，大粒个愛裝箱，放去果菜市場，就愛準備紙箱仔、膠帶、竹籃仔、簽字筆、報紙這兜東西，這兜李仔就會擺在水果攤賣，細粒个會用布袋裝，愛送去工場做鹹酸甜，就愛準備布袋、布蓬、索仔這兜東西，這兜鹹酸甜會在店面項賣。
摘大粒个李仔該下，竹籃仔掛在樹椏頂，目珠看著大大紅紅上粉个，就做得摘下來，放在紙箱仔裡肚，毋過箱底愛疊一層報紙，正做得放李仔落去。大粒摘忒換細粒个，就當好搞个事情就發生了，布蓬放在樹頭下，四隻角打開來拉等，一儕人用勾仔，勾等樹杷緊搖李仔，跈等就會落李仔雨，聽著布蓬頂嗶嗶哱哱个聲，布篷兩隻角對摺，布袋口打開來，放在布篷底下盛等，李仔就一粒粒碾到布袋裡肚，這就像人跳舞樣仔，無想到李仔也會跳舞，一下仔就跳到一布袋淰淰，袋口用索仔䌈緪來，疊到大路脣項，就有車仔會來載去工場做鹹酸甜。
當然摘李仔該下，李仔園項會堵著當多蟲仔？盡輒堵著个係虐毛蟲，會在樹葉仔項趖來趖去，毛𣛮𣛮緊趖當等人惱，還有囥在樹葉仔後背个㸐角仔，綠色个圓身，歸身个角都會掣人，有成時仔，手去摸著會掣一下，皮膚就會紅紅當癢起胮，當然毋會少忒，飛來飛去个蚊仔，額頭項輒常會停一隻蚊仔，花啦花啦个圓身，肚屎食到飽𩜰𩜰仔，手一搭額頭就有一溚血。所以摘李仔該央時，一定愛衫褲著好勢來，正做得輕鬆去摘“會跳舞个李仔”。
