范家愛玉園
【文、圖∕薛常威∕國立中央大學客家語文暨社會科學學系在職專班碩士】
發音人：薛常威（四縣腔）
范家愛玉園在美麗後山个花蓮玉里，玉里差毋多有27％个客家人，算係一個客庄。主人范振海摎大部分當地个客家人共樣，係自台灣西部徙過去个，范大哥兩公婆在日本時代自龍潭摎公館徙到玉里落食。范家子弟搬到花蓮還係照字輩，光、揚、振、綱、植來安名。
范大哥係農業經濟系畢業个，自美商公司退休下來以後，回轉故鄉用母親留下來个農地，看準愛玉產業个發展，開始專心推廣有機愛玉產業，經過范大哥摎苗栗農改場共下打拚，本來在山上个愛玉，乜做得在花蓮个平地來種了。同時，佢乜係產銷班个班長，運用自家管理个能力，幫助當地農民大小个行政事務。
其實，愛玉算將台灣特有个植物，非常難得。愛玉係隱花果，公嫲無共株，交粉愛靠特殊品種个愛玉蜂仔，這兩種物種互相利用，共下生存个方式斯台灣正有。自愛玉子到愛玉凍个過程，范大哥係用人工手揉个方式。摎熟个愛玉果摘下來，剝皮、焙躁，再過摎愛玉仁倒落棉布袋，用含有礦物質个冷水洗，洗出來个水變膠，就係淡黃色个愛玉凍了。
因為愛用蜂仔來交粉，故所愛玉樹一定愛在無毒、有機个環境正生得起來，無斯蜂仔會死忒。在這無毒个愛玉園裡背肚，還有木瓜、弓蕉、月桃，山豬，猴子乜會來這位尋食。
范家愛玉園除忒用無毒个方式來種植愛玉，摎環境共好。乜有用導覽个方式，分小學生，社會人士來了解這台灣特有个愛玉，仰般形種，仰般做愛玉凍，還過愛玉摎蜂仔互相利用，共下生存个道理。
范大哥乜利用自家个專業來幫助當地个農民處理像寫公文、申請政府經費、申請有機認證各項麻煩个行政事務，做到摎在地居民共下繁榮。
下二擺來花蓮，定著莫錯過這「范家愛玉園」。
