新街溪个生態景致（中）──水岸行廊
【文、圖∕徐貴榮∕國立中央大學客家語文暨社會科學學系兼任助理教授】
發音人：徐貴榮（四縣腔）
上一篇提着新街溪會做河濱步道，係民國90年917納莉風搓發大水過後，政府開始計畫整治老街溪、新街溪這兩條河壩，同時愛美化河邊景致，還做得分人休閒、運動。因為這條「步道」係全程分人行个，無像老街溪步道還做得騎自行車，故所安佢「行廊」。
這條水岸行廊，差毋多有8公里恁長。盡先從普義路新街橋分段、分截一直向南做往上，目前上到平鎮營德路480巷35弄98號邊（圖1）。向北從延平路橋右岸做往下，這下一直做到高速公路橋下吔！全程除忒從健行橋到東明橋大約350公尺、新興橋到埔頂橋150公尺係跈左岸，以及偉大橋到環南路大約450公尺，埔頂橋到新街橋大約1公里係兩岸都有行廊以外，其他路段差毋多就係在右岸。
圖1 行廊做到平鎮營德路480巷35弄98號邊，右片樹下就係新街溪。
（2021.06.23攝）
新街溪个上游，行廊還吂做該段，因為流域總下在平鎮區，故所安佢「平鎮段」。在平鎮平東路一段有一座清朝嘉慶16（1811）年，郭姓人起个建安宮，主祀開漳聖王，安到「三王公」，到今210年吔！人講「王公保外庄」，就知香火當盛。係客家庄唯一服祀三王公个一座「公廟」，由四鄰个社仔、東勢、南勢、山仔頂這兜庄頭輪庄慶典，逐年農曆二月15王公生，輪㓾豬公、請梨園做戲，最為盛大，到8月12還有做平安戲。
河水悠悠，流到營德路東北橋，左岸有原來安到「北勢水頭面伯公」个「北貴里水頭伯公」，宮前燈籠攬攬吊吊，香火鼎盛當鬧熱；右岸有一間清朝乾隆年間就有个「龍恩里伯公」，四片大樹遮天，人家也少，恬靜恬靜，無像對面北富里伯公燈火光華華，嶄然清幽。
歸條行廊，從營德路480巷35弄98號邊開始行往下，一直到平鎮環南路橋，差毋多就偎等龍岡邊脣，故所安佢「龍岡段」，差毋多愛行35分鐘。
新街溪從龍岡操場下開始，一直到玄天橋，差毋多就係平鎮、中壢个分界。過忒滿庭芳橋，就有一間當地信仰中心，原來安到「番子波水頭伯公」个「新興里水頭伯公」永福宮，係中壢新興里个水源所在（圖2）。
圖2 新興里水頭伯公「永福宮」（2020.05.09攝）
根據碑志所寫，係由楊姓人在這開墾个時節，用三粒石頭所發起奉祀个，毋過問附近个人，講該地方這下無姓楊个人家，大部分係姓鍾、邱、曾、戴、莊這兜。早期這間伯公同石頭庄伯公、後寮庄伯公係中壢後站三大伯公之一，逐年8月16（這下改到8月初2）做平安戲。光復過後，新興里分出去个林森、健行、振興、東興恁多里个伯公，還有石頭庄、中央里伯公逐年八月14做平安戲个時節，會用八音來請去看戲，過後正送轉來。
這段行廊大部分都光匱匱，完全無樹影，兩片近看犖犖个人家、工廠、還有田洋，遠看當多大樓，除忒寒天，平時日時頭當少人行（圖3）。
圖3 龍岡段行廊景致，光匱匱無樹影。（2021.06.23攝）
從平鎮環南路過橋到中壢環中東路，行往下到玄天橋，因為全部在中壢林森里，故所安佢「林森段」，差毋多愛行7分鐘。
一上這段，到健行橋，行廊地板全用像樹仔料，一料一料鋪个石板，落雨毋驚滑。這段大樹盡多，有樟樹、榕樹，還有櫻樹、桃樹、七里香、桂樹這兜。行到這段行廊項，大樹遮陰，迎風涼爽。春來櫻花、桃花連等開，八月桂花香飄千里、還有七里香來𢯭陣，行起來心肝非常个開洋。（圖4）
圖4 林森段樹蔭遮天，涼爽快意。（2021.06.23攝）
行廊脣个鐵架頂，每20公尺有立牌寫客家諺語、童謠、師傅話、山歌詞，還有李源發博士寫个客家白話七言詩，分行過个人頓腳下來，了解一下客家民間文學，還愛感謝有心單位保存客家語言文化个用心。毋過這兜牌仔全部當舊哩！黃黃舊舊字跡毋清楚吔！在恁靚个行廊脣，當毋合調，毋知有關單位有注意着無？看哪久做得來換一下吔！莫忘初心。（圖5）
圖5 頓到行廊欄杆頂个客家山歌詞，黃黃舊舊仔！試讀一下。（2021.06.16攝）
在紫雲橋前有一間民國57年創立个三教紫雲宮，正殿服祀恩主公，主神關聖帝君，還有太上老君、文昌帝君、釋迦牟尼佛，安到三教。聽講103年10月15臨暗仔，有一個信士來想愛問事業，結果跌筊个時節，跌着「企筊」（立杯）。過三日个10月18朝晨，又有一個信女，來求家庭平安，結果也跌着「企筊」，還跳上桌頂，消息傳出，大家試着係神蹟，大吉大利。故所雖然創立到今無幾久，也係一間香火當盛个宮廟。宮前廟坪當闊，每一朝晨、暗晡，當多人在宮前運動。（圖6）
圖6 三教紫雲宮（2021.06.22攝）
從玄天橋、龍岡橋、健行橋，東明橋、中北橋、縱貫鐵路下到中山路埔頂橋，經過石頭、東興、健行、新興、中央這兜里，這兜地方早期大部分屬於石頭庄。還有新街溪以前也安到「石頭溪」，故所這段安佢「石頭段」，差毋多愛行25分鐘。
過忒紫雲橋，河壩漸漸轉向，在過玄天橋無幾遠吔，一轉彎就向東，完全流落中壢區內，左岸有一間石頭伯公。以前這搭仔大部分係湯姓人个地，故所石頭庄伯公祠个地也係湯姓人捐出來做个。龍岡橋到健行橋這段，左岸有一隻細公園，東興社區發展協會在樹筒項種石斛蘭、揚擛蘭（蝴蝶蘭），發展到異有特色，蘭花開到靚靚，因為對面無做行廊，淨做得遠看定定。係講愛過去看，就愛在龍岡路口䟓工斡過去。
這段路脣有樹仔，毋過無幾高大，大部分係櫻樹這兜觀賞樹，日時頭無好抵涼，毋過春來就櫻花盛開，變成賞花之路。到健行橋，向北百過公尺，就係中壢火車頭，向南三百零公尺就係健行科技大學，向前看就係健福宮，新街溪在頭前个牆壁下慢慢仔流過。健福宮原來係細細仔个伯公祠，50年前改建到這下个規模（圖7）。最有名个係二月初二伯公生食伯公福，逐年就超過80張桌，十分無簡單。（圖8）
圖7 這下个健福宮，舊年正整治好个新街溪、行廊步道。（2021.06.22攝）
圖8 健福宮二月初二伯公生食伯公福，右片就係行廊步道。（2012.02.23攝）
過忒健行橋，行廊轉到左岸，過健福宮前到東明街，又轉到右岸，在華揚醫院前轉向北到中山路埔頂橋。這段路完全無樹仔，尤其係中北橋到新興橋，過鐵路下到埔頂橋這段，係最慢完成个。彎彎斡斡，捩來捩去，車仔過上過下，行起來驚驚掣掣。（吂完，請等下期完結）
※本文的「着」，同教育部訂的「著」之意。
