只有車馬來閃城 哪有城牆來閃車
【文／何石松】
發音人：何石松（海陸腔）
只有車馬來閃城，哪有城牆來閃車，係講亻厓俚介車仔經過城牆時，一定愛閃城牆，毋係城牆來閃車仔，這雖然係非常簡單介一句話，但係非常有道理，尤其係出自一個七歲細人仔，在佢面對孔子時節，所講出來介天機妙語，智慧之花，嗄一直流傳幾下千年。
原來，該全係一隻「理」字，車仔閃城牆，斯像講話愛有理共樣，正經係「大人無理不可信，七歲理正也愛聽」，值得深入思考。
聽講春秋時代，有一日，孔子摎佢介一群學生仔，坐馬車經過齊國都城時，看著一群細人仔在該搞球仔，其中一個細人仔坐在路上作城牆，毋閃車。孔子就責備講：「你仰毋閃介車仔？」細人仔回答：「自從盤古開天到如今，只有車馬來閃城，哪有城牆來閃車？」
孔子就下車問佢：「你人仔細細，仰恁巧又恁猴呢？」細人仔講：「人生三歲，分別父母；魚生三日，游於江湖，這係天生自然，講麼介巧又猴？」「該請問你戴在哪鄉哪里，安到麼介名？」「亻厓斯戴在本莊賤地，姓項名橐，今年七歲。」
孔子看這細人仔恁聰明，斯邀請佢共下去遶山花。路上經過一片松樹園，項橐就問：「仰般該山頂介松樹四季長青，毋會落葉？」孔子回答講：「因為松樹內肚係實實在在，毋係空殼介，所以你細人仔，這下愛多讀書正毋會心虛。」
過無幾久，經過一片竹園，項橐斯開始堵佢：「你講介可能毋著喔，你看該滿山竹仔，一年四季乜係青離離啊，佢介肚屎也係空介，毋係紮腹介呢！」孔子嗄無話好講。
馬車來到陂塘漘，一大群介鵝仔嘎嘎滾緊叫，又亮又大聲，項橐問：「仰般該鵝仔介叫聲恁大呢？」孔子回答講：「因為鵝仔介頸筋恁長，所以佢介叫聲正恁大。」
一下仔馬車來到陂塘下介田漘，田竇肚介蛤蟆當當在該叫，乜盡大聲，項橐就講：「孔子啊，你講介又毋著咧，你看該蛤蟆介頸筋恁短，仰可以叫恁大聲呢？可見你根本係騙人介。」
項橐又問：「請問該鵝仔摎鴨仔，仰般恁會泅，又能在水面浮起來？」孔子就講：「因為鵝仔鴨仔介腳，係四四方方介，所以能夠浮起來。」項橐黏皮應佢講：「毋著，毋著，你看該龜仔摎團魚，佢兜介腳毋係四四方介，也係恁會浮啊！」
孔子介回答，連連續續分項橐堵轉去，試著已無面子。不過，該項橐像人還當興頭，愛問到柄來擎共樣，捉等孔子，又緊問：「請問天有幾高？地有幾賁？海有幾深？」孔子講：「這亻厓就毋知唷！」想想啊仔又講：「你專門問該天西恁遠介事情，亻厓仰會知呢？愛問就問較近兜仔介事情啊！」
項橐就問：「請問你介頭那毛有幾多條？你介目眉毛有幾多條？還過，有幾多條鬍鬚？」孔子搖搖頭，又講毋知。項橐就講：「哎！遠介你毋知，近介你也毋知，做麼介聖人？」
孔子今日正經係上了一課咧，突然間客氣起來，就講：「你實在有慶，亻厓拜你為師好無？」所以項橐七歲就變孔子介先生。《三字經》就有講：「昔仲尼，師項橐。」孔子係聖人咧，還恁煞猛，實在了不起，難怪佢會講：「三人行，必有我師啊！」
可見，吾俚一定毋好看輕人！所謂「欺大莫欺細，欺細無面勢」，這兜後生仔，未來係不可限量介，黏皮就安腦佢講：「後生可畏，仰知下擺會輸亻厓兜人呢？」從此以後，就決定好好來教育下一代，知就知，毋知就毋知，毋好強講自家知，這正係真知！
小小介項橐，七歲就講出千古名言：「只有車馬來閃城，哪有城牆來閃車。」該就係：「只有言辭來閃理，哪有道理來閃言？」斯愛講得著，孩童也係先生啊！
※本文的「介」為大眾通用的「的」，同教育部訂的「个」之意
