別人个龍床 毋當自家个狗竇
【文、圖∕黃美貞∕光復國小教師】
發音人：黃美貞（四縣腔）
半頭青个細人仔，大體仔會試到爺哀當會唸唸唸唸，爺哀又試到細人仔畜大就變別人个，親情就像薄紙樣仔，輒常為著細項下个事情打毋堵好，子女就有可能離家出走，爺哀又愁到麼个邊仔，因爭恁仰上電視新聞个事件，斯嶄然多哦！
逐隻時期个屋仔就有厥个特色，有一站仔，灶下係另外搭一間石綿瓦个屋仔，等歸棟樓仔屋做好正搭出去，堵好阿姊个屋下乜係這種型式。該日暗晡，旋旋風傳來个聲斯嚇到阿姊睡毋忒，老灶下既經變成閒間仔，放兜罕得用个東西，仰會有瓦爛忒个聲呢？佢定定仔行去樓下，阿姆哀唷！天蓬爛一隻大空，連桁仔就斷忒哩！
阿姊擎起一枝棍仔，心肝肚愐等：「無成係賊仔無行好勢，嗄躪爛石綿瓦？」佢轉捩一圈，無看著半隻鬼鳥影，無成係走忒哩？便所門無關好，可能會囥在該，佢用腳蹬開門，無想著一个看起來正十五六歲个細妹仔，歸身仔壅塵打灰，恬恬仔企在該位，算來係人也係鬼？嚇到阿姊抽胲另命，開聲問：「你係麼人？愛做麼个？」佢細細聲仔講：「亻厓歇在隔壁，想愛跈朋友出去尞，阿姆又毋肯，就偷偷仔從樓頂走出去，再跳到若个屋頂，無想著嗄在屋頂跌下來。」
這間兩棧半个屋仔，外壁粉粗粗个紅毛泥，又在大圳溝脣，屋裡肚合陋陋少少，實在無打眼，毋過好得有一間屋仔好跍，在姐丈過身後，阿姊一隻婦人家，帶等三隻細孲仔生活，有一駁仔識轉妹家歇，阿姆想加減相扌帣，妹家人多，間房乜有伸，共伙食乜好，後來，阿姊還係轉去自家个竇，佢講：「自家愛擔硬，嫁出去个妹仔係潑出去个水，『別人个龍床，毋當自己个狗竇』。」阿姆雖然毋盼得，還係由在阿姊自家，幫幫撥撥就過吔二十零年，阿姊也做兩面阿婆哩。
阿姊看等眼前這个毋知頭天个細阿妹仔，想愛講个話在喉嗹頭嗄講毋出來，單淨希望佢轉屋下做得想通來，深更半夜个冒險，敢有值？連半條命就會嚇忒哩！還係遽遽送佢轉屋去，有麼个事情好好來參詳，攀籬吊壁就留在武俠小說裡肚正好哪。
