再講吾若厥
【文／羅肇錦∕國立中央大學客家語文暨社會科學學系榮譽教授】
發音人：羅肇錦（四縣腔）
客語个代名詞第一二三人稱主格个「崖你佢」，係講轉換所有格「吾若厥」嘎下，愛用麼个漢字？運用个規則係麼个？這个問題非常複雜，規則个看法也各人有各人个講法，盡難有共識。在這位，崖提出幾個崖看著个現象分大家做參考。
首先愛說明个係：
「吾」（ngaˊ）毋係「崖个」（ngaiˇ＋ge ）个合音字。
「若」（ngiaˊ）毋係「你个」（ngiˇ＋ge ）个合音字。
「厥」（giaˊ）毋係「佢个」（giˇ＋ge ）个合音字。
毋係合音字，該係麼个規則？樣仔變化呢？答案係主格變所有格，採取主要元音過聲調變化來形成所有格个方式。
ngaiˇ→ngaˊ（aiˇ→aˊ）
ngiˇ→ ngiaˊ（ iˇ→iaˊ）
giˇ→ giaˊ （iˇ→iaˊ）
假使係合音，照一般合音个規則（前字聲母後字韻母）
ngaiˇ＋ge 會變ngeˊ，
ngiˇ＋ge 會變ngeˊ
giˇ ＋ge 會變 geˊ
可見四縣話个「吾若厥」毋係「崖个你个佢个」合音。另外四縣話个「吾若厥」做得背尾直接加一般名詞，像吾目珠、若目珠、厥目珠，吾鉛筆、若鉛筆、厥鉛筆），又做得「吾若厥」背尾先加「个」又正加一般名詞，像吾个目珠、若个目珠、厥个目珠，吾个鉛筆、若个鉛筆、厥个鉛筆。但係做毋得講「崖目珠、你目珠、佢目珠」，也作毋得講「崖个鉛筆、你个鉛筆、佢个鉛筆」。反正所有格有形容作用个定著愛用「吾若厥」做毋得用「崖你佢」。
四縣話肚還有一個規則盡特別，對親戚抑係屋家人，比自家較大个人，抑係較長輩个人，僅可講「吾若厥」做毋得講「吾个若个厥个」。像做得講「吾姆、吾舅、吾公、吾哥」做毋得講「吾个姆、吾个舅、吾个公、吾个哥」（換成「若厥」也共樣，可以說若姆、厥姆，不能說若个姆、厥个姆）。這種特別个現象，也做得用來證明，四縣話个「吾若厥」毋係「崖个你个佢个」合音。
既然四縣話个代名詞所有格，毋係「主格（崖你佢）＋个（ge）」恁樣个結構，故所定著愛尋三隻「音近義同」个漢字來用正做得。恁賭好，司馬遷《史記項羽本紀》肚有一句話，漢王曰：「吾與項羽俱北面受命懷王，約為兄弟，吾翁即若翁，必欲烹而翁，即幸分我一杯羹。」這句「吾翁即若翁」用現代客話來講就係「吾爸就係若爸」，哪去尋恁賭好个空頭，「吾」拿來做「崖」个所有格，「若」拿來做「你」个所有格。另外，《詩經大雅》記載：「無念爾祖，聿修厥德」常用成語「厥功甚偉」其中「厥」係代詞，同「其」字用法差毋多，故所「厥」拿來做客家話「佢」个所有格。
用恁樣个方式來講客話所有格「吾若厥」係非常費氣个事情，毋過無恁樣這挖該鬥，彎彎斡斡，實在就難講畀分漿。希望這種想法，做得提供大家對客話用字，有較無共樣个規則，同較無想著个漢字。
