看毋著个你
【圖／李岳哲；文／邱一帆／國立中央大學客家語文暨社會科學學系客家研究博士班】
發音人：邱一帆（四縣腔）
亻厓仰般擘大目珠
眼盯盯仔緊看
抑係拿膨鏡來照
乜看毋著你在哪位上班辦公
全世界个人都當驚你
哪時一無細義
會分你遰著
年零以來你偷偷撂撂
無聲無氣跈等人
空運海運陸運
遰到全世界
幾多人因為你來著病
幾多人因為你來過身
幾多人因為你無頭無路
幾多人因為你家庭破碎
你毋使認罪乜毋使辯護
你毋會分人判刑乜毋使坐囹仔
全世界个人乖乖，也係脧脧
囥到自家个屋間
大門窗仔關揫揫
就像為你坐囹仔
嘴揞仔戴好來
有發燒無
額溫量過吂
酒精拿來噴噴啊
毋好行恁兼
衫褲鞋抹脫忒去
門把開關桌凳消毒水捽捽啊
……
這兜微毛末節就係因為你
變到日常生活个大事
看毋著个你
毋知你對哪位出世
毋過，當多人講你來自武漢
鬼正知，你有恁多走種
麼人做得講到扚對
對武漢到全世界个色相
