處處引燈處處溫情（上）──懷念古國順教授
【文、圖／鍾榮富／南臺科技大學應用英語系講座教授】
發音人：鍾榮富（四縣腔）
雖然從古老師入院，歸轉屋下療養，到今已經有一段時間了，但係忽然聽著古老師歸去个消息，心中還係嶄然捨毋得。懷想過去，古老師一直都係𠊎研究路上个一盞明燈，不論堵著麼个大小問題，同佢請教之後，心中總會感覺到豁然開朗。佢對於客語个推廣、重視、堅持，佢个治學態度，到今都還係深深影響客家後進。
古老師同𠊎非親非故，學術研究的領域乜無共樣，成時對於客語漢字个採用還會看法不同，彼此相爭，但是初次認識至今，古老師始終煦然如故，親如春風。𠊎等第一擺見面係1991年，桃園縣政府主辦客家文化研討會，大會邀請𠊎去發表論文「客家童謠个語言」，請湯廷池教授來講評。中場茶會時間，古老師拿等一茶杯，一張名片來尋𠊎，慢慢仔對客人个文化講起，無已久，話題切入頭先个論文，佢講無想著客家童謠个語言，竟然也做得用現代語言學理論來分析，佢感覺著盡歡喜，同時指出這可能係未來值得行个新路。講等，講等，親像在不經意之間，佢隨口吟誦了好幾首𠊎從來無識聽過个客家童謠。該年在桃園个研討會，係𠊎一生中第一擺聽著海陸客話，全場𠊎完全聽毋識，比去外國參加研討會還過慘。古老師念个童謠，就係用海陸客，後來佢再用四縣客同𠊎解釋一遍，𠊎強快拿筆記記下來。隨後兩場研討个論文，古老師一片同𠊎講解，一邊同𠊎翻譯，讓𠊎能做得在又驚怕又擔心个環境中，漸漸整理出四縣同海陸个對應差別。
幾年以後，有一日𠊎收著佢寄來个書，親筆愛𠊎指教。身為後進，𠊎又欽佩又緊張，強快回信同佢恭喜，毋敢講指教，但會用心拜讀。原來該就係古老師1997年受到文建會（文化部前身）補助出版个《台灣客家話記音訓練教材》，開創了台灣語文學會制訂个「第一式」同「第二式」並列標音个先河，為客家話个語音教學豎立了清楚个指標，到今還係客家學生、研究生、學者、客語教師同支援教師重要个參考書。該書詳細列了四縣同海陸各種可能的聲音同可能个音節，兩个腔調不同个地方還做了比較，讓初學者入門了解。後來有盡多客家語文課程个講義，各地方政府出版个教科書，都係以該本書為基礎，故所該本書在教學實務方面影響十分大。
2001年客委會成立之後，開始大力推展客語教學，邀請當多客語專家共下聚會編教材，編字典，𠊎同古老師見面同受佢照顧个機會越來越多。該當時，𠊎受文建會个委託，編寫《福爾摩沙烙印—台灣客家話導論》，一堵著問題，就帶去同佢請教，古老師總係耐心同𠊎看稿，點出問題，提供資料分𠊎改正。
