楊梅个楊梅
【文／邱鴻春／中央大學機械工程學系碩士】
發音人：邱鴻春（海陸腔）
五月九號禮拜日這日，妹仔安排全家來到楊梅老莊園食晝，摎阿婆來過阿姆節，三代同堂食到笑弛弛。
食飽晝崖載等阿爸阿姆轉，經過楊梅國中，遠遠看著盡生份个樹仔，樹頂有打盡多个紅子，老爺仔講，該係楊梅樹。
楊梅老名安到楊梅壢，頭擺楊梅有當多楊梅樹，但係，慢慢工商个發展，滿遍開發起屋，也做工廠，楊梅樹續來斬淨淨，就較無麼有看著楊梅樹咧，有兜人在楊梅戴幾十年無看過楊梅樹，還毋知佢生著麼个樣！
分阿爸恁講，崖也感覺盡見笑，過忒兩日仔，有點衖縫个時間，車仔駛過來，停下車來看詳細，原來楊梅樹生著這樣形，打个楊梅子也盡生趣，試食一隻酸勼勼，毋過還係無梅仔恁酸。
臥頭恬恬看樹頂，發現樹頂吱吱喳喳盡鬧熱，當多鳥仔來討食，走走追追在該搞，觜觜啄啄跌到滿泥下，人行車過綿淨淨，看著實在盡打爽。行兼樹下來看看，看著樹身有箍等鋼弓線，原來桃園市政府早就有來管理，逐欉樹仔全有編號，有自家个身分證，做毋得盡採來裝壞忒，楊梅區樹一定愛保留下來，後代子孫正會知，俚楊梅自家个文化。
聽講楊梅果乜盡有營養，有當多个維生素摎有機酸，食兜仔對身體盡好，還做得止渴，對胃腸也異好。想著一庄一特色，楊梅農會這幾年，大力推廣仙草茶个相關產品，係講做得來開發一兜楊梅果汁个產品，該斯正經名符其實个在地特色產品。
當然，若係仙草摎楊梅來比，仙草當然本錢會較低，相信農會來指導種植楊梅，一定也無麼个問題，但係採收會係最大問題，採收期較短又難摘，全部愛靠人工，完全係等毋得个，無像仙草還做得用機器來剪。其實用崖學機械个角度來看，係有資金个預算，還係有辦法來解決這隻問題，做得用機器來採收，希望加幾年仔，來到餐廳食飯，也係農會門市，就有楊梅汁做得來選擇，該斯正經當湛斗咧。
