乖乖个傳說
【文／黃美貞／光復國小教師】
發音人：黃美貞（四縣腔）
前一駁仔，英國廣播公司有報導，講著在臺灣有一个都會傳說，當多醫院、銀行同科技公司，會在儀器同電腦頂高放一包青色个乖乖，恁仰就做得保祐機器乖乖進行，毋會故障，還做毋得開來食，也做毋得放過期哦！
這隻喊做乖乖个零嗒，係陪等當多人共下大个童年回憶。小學仔个時節，每一學期會有遶山个活動，大家个包袱仔肚項，除忒茶壺、麵包，定著會放一包乖乖，先生帶等大嫲陣个學生仔，行等去公園無就大間个宮廟，行到位就會先點名，確定正確个人數，續下來就係𠊎兜盡歡喜个時節，緊打嘴鼓緊食乖乖，交換無共樣个口味，還有細細个玩具好搞，在該物質缺乏个時代，恁樣就試著十分滿足了。
打幫網路个發達，知得乖乖公司一開頭係製藥起家，後來經濟發達，看著休閒食品个商機，就開始用包粟粉來做餅胚仔，再過調味、焙燥，毋使用油炸過，結果業績當好，頭家講：「安名仔乜當重要，好聽好記又好念，還係爺哀對細人仔个希望。」後來，再開發用在地生產个米來做米乖乖，同其他个企業合作出聯名乖乖，又過同便利商店、牛乳廠開發出椰仔牛乳口味；還有用袋仔做鎖匙圈仔，運用話題同創意得著後生人个歡迎，乜將這份「乖乖回憶」延續下去。
又做麼个一定愛用青个乖乖來避邪？乖乖公司講：「因為青色代表順利、紅色代表愛情，黃色係代表錢財。」故所，看各人个需要，就用哪種色个產品，普渡拜喏个時節，就有一大箱个青色豐沛箱，有兜人試著係迷信，有兜人試著係安心，漸漸仔，就變成一个無成文个風俗，一个特殊个光景，後來青乖乖个銷路特別好，變成一個生趣个故事。
逐隻時期个零嗒，做得反應出來該隻時代个樣仔，毋單淨係懷念个味緒，乜做得表現出來時代个文化，有兜仔停產，愛去博物館正尋得著，有兜仔生理緊做緊大，還賣到外國去，愛仰般跈得著潮流，就愛看頭家儕帶頭个企業精神。
