罔講笑
【文、圖／彭欽清／國立政治大學退休教授】
發音人：彭欽清（四縣腔）
五月中仔起勢，covid-19个風性緊來緊得人畏，哪就毋敢走，囥在屋下。閒閒無做麼个，就整理電腦肚个舊資料。尋著兩三年前寫同客話有關个笑科，大體就係自家生活項堵著个，有个係朋友講个。
這一駁仔，受著疫情影響，大家都當慍悴，下背就拿幾則仔同大家分享，同大家共下來苦中作樂。
寶島客家電臺開臺頭幾年仔，𠊎一禮拜主持一點鐘个現場節目，名仔安到「噥噥哢哢」。接下來个節目主持人係當時个市議員陳淑華，佢係holo人，會講兜仔客，也已肯學，厥老公係西湖人。第一擺堵著佢，佢聽𠊎講係大湖人，就應講：你係大烏蠅哦！𠊎屎烏蠅。脣項个人聽著，㖸到毋會停動。
做過臺北市金華國中校長个鄭奕宏先生係竹東人，在電臺乜有節目。有一擺聽佢講，厥倈仔從細仔在臺北大，還細該下，厥婆會對莊下帶紅柿仔分佢食，佢聽厥婆講過，在青柿仔个蒂頭項點焿油，翕幾日仔就會轉紅變軟。
佢下後去南部讀書，有一日在市場買著幾粒仔青柿仔，轉去煞煞去拿odoby仔機油，點在柿仔蒂頭項，放在櫥仔肚。幾下日過後，佢同柿仔拿出來，吂知還係浸青，無法，佢就打電話轉去問厥婆。老人家問佢焿油係哪買个，佢講係odoby項个。厥婆講：戇孫仔，毋係點這種機油，愛點做焿粽个焿油啦！
讀大學該下有一個同學係新埔人，畢業過後在台北成家立業，愛放尞也係年節正有轉去看厥爺哀。老人家會想孫仔阿文，下擺仔會打電話同佢講幾句仔，兩子阿公一下客一下國語，講到有來有去，吾這同學看著盡暢，阿文个客話乜進步已多。
有一日，做阿公儕又打電話來愛同孫仔譫哆，講啊講仔，阿文講：阿公，有空來住啊。阿公聽誒，知孫仔个意思，就笑笑講：阿文還乖唷，你係喊阿公有閒來去臺北戴係無？好啦，阿公有閒正上去戴幾日仔啦。阿文聽誒，跈等應講：係啦，係啦，阿公有閒上來戴啦。
阿文掛忒電話，厥爸同佢講：阿公還慶，揣得出若話。愛記得客話「有空來蛀」个國語係「有洞來蛀」哦。
有一個holo細阿姐仔，厥男朋友係客人，佢當煞猛學客，見有客話講習就會去參加。有一擺講習最尾一節係座談會，分學員問問題。這個細阿姐仔頭一個擎手講：你恁多个大核教授核問恁好，𠊎核著當多，希望以後有機會同你這兜多核習。吂等佢講煞，其他个學員逐個都㖸到出目汁
講笑科愛看場合，毋係麼个場合就做得取在你講，愛考慮著族群、性別、老嫩。係無，講出來个笑科怕會刺著人，乜會傷著自家。
