牛犁社區交流協會
【文、圖∕薛常威∕國立中央大學客家語文暨社會科學學系在職專班碩士】
發音人：薛常威（四縣腔）
「做牛毋愁無犁拖」，牛犁社區交流協會就係自這句話來个。2001年成立，建立現代居民特色个社區營造工作，協會關懷村中个老人家、婦女、後生人，還過環境。日本時代，總督府鼓勵日本人移民東部，成立像豐田、林田、吉野這種个移民村，豐田斯在花蓮縣个壽豐鄉。壽豐主要戴个阿美族个原住民摎客家人，因為豐田本來就係一隻移民村，故所當多日本時代留下來个東西，像摎棋盤共樣个街路，還有豐田小學校（這下个豐裡國小）、移民指導所、豐田派出所廳舍、豐田神社。
壽豐鄉乜有盡多个客家人，大體係日本時代自西部臺灣桃園、新竹、苗栗徙過去个開發農場个，故所在豐田，講客家話乜做得通。豐田係當有文化歷史个所在，這幾年，又多加新个色彩，就係在南洋徙過來个新住民，特別係本來就會講客家話个印尼新住民，像協會裡肚新住民組个楊雪霞、黃愛婷、張美君。佢兜个祖先係清朝該下自廣東移民到印尼个華僑，嫁來臺灣乜有10年、20年了。
因為新住民个加入，客家文化開始有了新个變化，像東南亞異國个元素，像食个菜、著个杉，還有手工藝術品。佢兜用蠟染來推廣融合印尼風情个客家文化。製作蠟染愛盡有耐心，除忒愛分蠟融化，還愛用蠟針筆慢慢滴蠟，針筆个孔愈細，滴蠟愈精緻，也愈花時間。一件作品經過畫圖，上色，還愛用水煮過定色，單淨畫圖就愛三日，沒耐心一定奈毋何。
佢兜个作品有當有華人特色个迎龍打獅，還有當多係有印尼異國風情个圖畫。蠟染算將係印尼个世界文化遺產，值得多多來推廣。雖然佢兜這下還吂有自家个店面，還係希望大家來支持這群會講客家話个新住民，分佢兜在臺灣有自家个事業。
