客家大師古國順先生後生時个一段經歷
【文、圖∕徐貴榮∕國立中央大學客家語文暨社會科學學系兼任助理教授】
發音人：徐貴榮（四縣腔）
分人尊敬个客家大師古國順教授，亻厓兜一直都喊佢「古老師」抑係「古先生」。自佢兩年前得病過後，大家就當希望佢遽遽好起來，過再領導客家、傳承客家。無想着（2021）5月21當晝，朋友傳來過身个消息，心肝著一下大驚。想着同佢熟事四十零年，一直受佢个鼓勵、牽成，感覺萬分个傷痛同毋盼得。古教授个過身，毋單淨係客家界，也係全國語文教育界个一大損失。
古先生家庭和挼美滿，做事勤勞煞猛，做人謙和有量，做學問嚴謹深入，做先生認真有法。「還我母語運動」過後，用心推廣客家文化，召集編輯客語認證詞彙資料，協助客委會推行客語認證，培訓客家語文教師，牽成後進，不留餘力。得過客家終身貢獻獎，係客家之寶毋使講，人人就知。有關古先生个經歷、紹介，也有人報導過，像《客家雜誌》266期（2012.8）有葉倫會先生寫个「古國順學富五車 醉心客家」，《中央大學客家學院電子報》97期（2009.11.15）有江欣潔寫个「專訪古國順教授」，246期（2016.2.1）有李秀鳳整理个「越老越勞碌～古國順教授的學思歷程」，還有筆者舊年（2020.11）出版个客語散文集《58°个鄰舍情》裡肚有一篇〈三湖才子〉也係寫古先生个。
以個人所知，古先生細細時屋下當苦，毋過會讀書還異會搞，記性當好，多才多藝，莫看佢嚴肅，成時還異會講笑喔！這下就來講佢後生時个一段經歷。古先生出世个時節，堵堵二次大戰後期，愛囥空襲又愛做事，無東西好食，贌田耕愛繳租穀，耕个田大石細石歸大堆，長透食番薯同苦蕒，想愛食一餐純米飯就難。雖然有四個阿姊、兩個阿哥，佢座最細又乜恁做。厥爸講：「有種就有好食」，故所從細跈阿爸做田事，還會煮食。生活艱苦，深深體會孔子講「吾少也賤，故多能鄙事」个話。
光復過後，厥爸雖然係耕田人，毋過有讀兜漢書，想着換中國政府吔！兩個阿哥讀日本書讀到半離半棧，深明大義，就同囥到屋樑頂上个漢書拿下來，利用晚晡頭親身教子弟讀漢書，一直到小學幾下年正停忒，故所從細就打下當深个漢學基礎，對於後來讀「傳仔」，研究古文，做學問，都當有幫助。
古先生兩個阿哥都無讀初中，毋係去做工就係學手藝，本來佢乜無好讀，小學畢業就愛去同人做長年，結果先生來講正有書好讀。好不容易中壢中學畢業，本來無好升學个，成績恁優秀仰毋升學？當時个溫麟校長問着原因，講「無錢去讀師範！」當時毋知麼个係師範？好得厥同學「張璧峰」个阿爸師範畢業在國校教書，就當好心同佢講：「讀師範毋使錢，有好食又有學寮好棧，畢業做先生」，哪有恁好空个事情？古先生聽着就當暢，走等轉去同厥爸講，厥爸正分佢去考。
毋過連年大天旱，田全無收成，屋下恁苦哪生報名費、旅費好去啊？當時報名費就愛15箍，厥姆講「想辦法去尋」，聽講毋知賣忒幾多粒雞卵抑係麼个？拿着准考證正知學校同佢報个係臺北師範。又毋知臺北師範在哪仔？好得細人仔伴有一個安到「王秀雄」个，厥爸在臺大農業試驗所上班，離北師當近，就答應分佢到厥宿舍臨時歇宿，毋過分歇無分食。屋下恁苦愛較省兜仔，沒錢好買，就從屋下帶三斤米，摘兩把蕹菜，一把白菜，買一罐「福神漬」，炒一包番豆米，就恁樣大包小包，在考試前一日，跈著同學个阿爸帶等上去，用宿舍个油爐自家起火煮來食。窮苦人就恁樣，自家把變，好得有考上師範。溫校長同厥同學个一句話改變佢一生人，古先生講：「一生人就感心。」
講着古先生个記性，還較分人琢服。受着厥爸个影響，細細仔就當愛看「傳仔」，佢講第一本看个係「薛仁貴征東」，後來看到入迷吔，到中學个時節，圖書館項麼个傳仔，借得着總下就借來看，一本看幾下遍。看完還講分同學聽，同學還話着佢看小說係用背个。古先生講：「當時看傳仔毋係儘採看得，阿爸在准、毋准之間，無一定个標準。故所，看傳仔定著愛了解時勢，正毋會毋知仰般就分人大罵。」這習慣一直到讀師範過後，受着教授个影響，正讀慢慢仔改讀外國小說、翻譯小說。到六、七十歲，毋單止細細讀个漢書，做得用客話背出來，就連傳仔裡背个詩句仔也背得出。
細細仔毋單止會讀書，也異會搞，除忒放尞時節走相逐、放紙鷂仔、𤌍窯以外，當輒搞个係「關掃把神」，十分生趣。仰仔搞呢？愛先選出一儕，同掃把打直，兩隻手揢核掃把柄，面伏到兩手背。其他共下搞个同香插到掃把桿頂高，拜完過後，燒兜仔在屋下帶來个銀紙，抑係用忒扯下來个簿仔，念「天靈靈，地靈靈，過山過海去請神，請神轉來紮菅掃，菅掃老老嫩嫩也有神。」恁樣細細聲仔反覆緊唸，一直唸到伏等个人關得起來，神就起靈，當像童乩樣仔，掃把就會緊搖。愛幾久正做得關得起來，時間長短無定著，有時愛有一支香个時間，有時當短。到關起來咧！就喊：「掃把神－掃地」，該拿掃把該儕就會左右掃地。搞一下仔過後，試着無趣味吔，就換喊：「掃把神－割禾」，佢就會像割禾樣仔。喊「蒔田」、「挲草」，無毋照做个，還像到無跌忒，實在神奇。搞𤸁吔！就共下大聲喊厥姓名，該揢掃把个跈等就醒起來，遊戲結束。這種搞法，並毋係逐個人都「關」得起來，像古先生成績好，當會讀書个人，無論時間幾久，就關毋起來，做毋得童乩，聽講愛該兜「戇直」、「天天」个正有法度。
還有一種搞个安到「關筷仔神」，用六枝筷仔，兩人對陣，一人三枝，形成ㄇㄩ个形對峙。係講請着筷仔神吔！其中一儕喊：「喊筷仔神！」就做得問日常生活个問題，比論講：「東西會起價無？」係講會起，ㄇ形个兩翼就會閕開，係毋會就變△形，有靈無靈、有準無準，係另外一回事，當時確實非常流行，當像後來个「碟仙」。當時古先生毋單會搞，還當會讀書，又會講故事分同學聽，人緣當好，故所係班項个頭仔，參加演講比賽得名，也識做過全校个小鎮長。
講着多才多藝，古先生个阿爸，當好看戲，轉來還會講戲文分屋下人聽。大部分就係歷史忠孝節義个故事，當多係傳仔項个內容。古先生長透也跈等去，大約係十五間、楊梅、湖口、伯公崗這兜地方，當時當流行「亂彈」這大戲，故所古先生對戲仔也當有了解，造成後來榮興客家劇團請佢做顧問，客家歌劇比賽請佢做主審委員。當然，做戲定著愛有音樂，古先生厥爸會鋸弦仔，有閒就鋸欸幾條山歌抑係戲曲，佢有樣學樣，厥爸看佢恁有興趣，不時也教兜仔。古先生生來就即靈聰明，當遽就學會，故所從細就有音樂基礎。小學畢業，有人看佢會鋸弦仔，來喊佢去學八音，結果讀中學無學成。師範畢業教小學三年期滿，因為從細有音樂基礎，讀師範學過風琴，會打擊樂，對音樂特別有興趣，想愛考師大音樂系。毋過當時擔任升學班个導師毋敢請假，一直到最尾一日，正用禮拜日去師大報名。無想着排當長列，等到驗證个時節就下晝頭吔，一驗正知無帶着身分證，無奈何頭犁犁轉屋等做兵。無想着一月過後，臺北師範升格為師專，招考二專國校師資科，古先生煞煞去考，慢慢仔正改變讀文科，行入專研古文个領域。這就怕係古先生退休欸，還去學八音圓夢啊！
因爭細細仔在窮苦、艱難个環境成長，阿爸个啟蒙，後生時節个一番經歷，打好做人做事个態度同基礎。後來過再先生个教讀，自家个聰明，煞猛个打拚，對客家傳承个認同，正有今晡日个成就。有人問𠊎講仰會安佢「三湖才子」呢？因為古先生恁多才華、恁有成就，人人尊重，也係吾个恩師，佢係楊梅三湖人，就用「三湖才子」一句話來包括古先生个一切，相信先生在天之靈會接受啦！
古先生一生人貢獻教育、客家，如今功德圓滿，晴雲秋月，風範永存，亻恩兜還愛跈等厥个腳步，為客家貢獻各人个心力！
圖1 古國順教授（左7）擔任社團法人臺灣客家語文學會第一屆常務監事，於辦理首屆學術研討會開幕式時，由創會理事長羅肇錦（右6）教授頒發當選證書與出席理監事合影。（拍攝地點：中央大學科五館、時間：2009.06.28）
圖2 編輯客語認證詞彙資料，古國順主任委員（左前3）同客語認證委員合影（拍攝人、地點、時間待查）
