韓湘拉等李鐵拐 一個吹來一個捧
【文／何石松】
發音人：何石松（海陸腔）
韓湘拉等李鐵拐，一個吹來一個捧，係講孝順介韓湘子懷念親恩，並感激救命介竹笐，吹簫化為春風，感動人心；李鐵拐惜花連盆，用葫蘆去救轉門徒哀仔介性命，並隨時渡化世間人，共下來行善。
韓湘子，係八仙裡背一等後生介，也係一等孝順介，逐日用簫聲來飲水思源，想念爺哀；李鐵拐，係八仙裡背地位一等低賤介，但是，佢逐日都捧等葫蘆去救人。佢兩儕，一個吹簫仔，一個捧葫蘆，斯像聖筊樣。湘子介簫聲，永遠係拉等鐵拐介心，正經係一個吹一個捧！
聽講頭擺大舜，有兩隻妃子，一個娥皇，一個女英，大舜南巡治水，嗄分孽龍咬死，娥皇女英就到湘江邊漘大噭，娥皇噭無幾久，斯先轉去，伸著女英一儕，日噭夜噭，噭到目汁闌干，噭襤濕褸，噭到江邊介竹仔全係佢介目汁，該目汁嗄摎竹仔潗到一隻空一隻空。唐朝李商隱介詩仔就講：「湘江竹上無限恨」，佢噭到當悿，毋知噭到幾久，嗄睡忒咧，發一隻夢，夢著老公大舜，開容笑面當溫柔介摎佢講：「承蒙你，對亻厓恁好，毋好噭咧，遽遽轉去，明年你斯會降隻徠仔，替亻厓報仇啊。」
原來係大舜託夢分佢。佢轉去以後，正經就有身項，無想著，嗄降出一隻紅肉介蟲卵，娥皇毋知女英發夢介事情，又看佢大肚屎，感覺奇怪，這下又降一隻怪物，拿起刀仔就愛摎佢㓾忒，當佢手起刀落，紅肉蟲卵就散為四百零㼓，裡背趖出一條蟲仔來，娥皇又擎刀仔，硬硬愛摎佢斫死。
雖然係降隻蟲卵，到底係自家降介。人講：「牛養牛接，馬養馬惜；蜘蛛降子背上壁，自家降介自家惜。」女英看著心肝子分人追殺，驚到像鑊頭肚介蟻仔共樣，儘命牯去救，該蟲仔看著有人愛㓾佢，煞煞尾瀉屎趖等走，一儕走，兩儕追，正經係性命上下啊，直直追到湘江漘頭，突然之間，女英跺著竹仔，竹仔恁多空，蟲仔黏皮鑽落空肚去，遽遽壙起來。
毋知經過幾多年，蟲仔成人長大，變做一條大黃龍，來到湘江，為大舜報了仇，又去修煉幾千年，修成正果，變成神仙，就係後來介韓湘子。
簫仔仰會恁多空仔，該係因為女英介目汁滴穿空介，空仔裡背，又係當年救佢性命介位所，難怪湘子逐日都愛噴簫仔，用簫聲來表達佢感念親恩摎救命介真情，所以有人講：「韓湘吹簫都堵都，幾多恩情竹空肚。」佢正經係「水井肚談戀愛」，實在「深情」啊！
講著李鐵拐，佢本名安到李玄，原本係一個英俊少年，斯因為靈魂愛摎太上老君去雲遊四海，斯拜託佢介徒弟，好好照顧佢介身體，講：「七日內亻厓一定會轉來，係講無轉來，你就可以摎亻厓介身體燒忒。」哎！恁無運，到第六日時節，厥徒弟介哀仔過身，屋下人追佢遽遽轉去，孝子之心，無轉做毋得。第七日時，就摎李玄介人身火化，轉屋去咧！
等到李玄雲遊天下轉來，嗄尋毋著自家介膚身。聽講靈魂係無在第七日之內轉到肉身，就永世無辦法返生，恁堵好看著一隻腳跛跛介乞食仔，雖然歸身烏趖滴答，污垢了了，姑不如將，也止好借屍還魂。從此以後，斯文俊秀介李玄，就變成跛啊跛仔介鐵拐李咧！
雖然係恁樣形，但是，佢介拐棍仔可以變成鐵棍，還有一隻寶葫蘆，裡背當多可以救命介靈丹。佢毋單淨無怪徒弟先走，害佢無法回復原身，還同情佢介徒弟無辦法見著哀仔最後一面，一想著這，佢就遽遽捧等葫蘆，拿出仙丹，去救厥姆，使佢返生，又毋講出自家介身分，化為一陣清風毋見忒咧！毋單恁樣，佢還滿天下捧等葫蘆去救人。實在係人醜心靚啊！
湘子係八仙之中最後生介，鐵拐係最媸介，莫看湘子年紀細，志氣實在高，莫嫌鐵拐人恁媸，葫蘆救人道德高尚。八仙之所以偉大，就係因為有蟲仔出身介韓湘子，摎盡媸介鐵拐李，毋會用外表來看人毋起啊！
你看，韓湘吹簫都堵都，鐵拐手拿寶葫蘆，斯像看著韓湘拉等李鐵拐，在滿遍春風行善介道路上，一個吹來一個捧，你吹亻厓捧，係仰般介和諧感心呢！
※此處的「介」為大眾通用的「的」，同教育部訂的「个」之意
