作客「池上」 看著「東客」
【文、圖／袁援／國立中央大學客家社會文化碩士班二年級、客語漢字／陳芯慧／國立中央大學客家社會文化碩士班二年級、】
4月24號朝晨7點57分，國立中央大學客家系碩士班个先生摎學生仔共下坐等自強號火車去臺東池上。火車穿過鬧熱尖尖个臺北城市，轉一隻彎就到了宜蘭摎花蓮，亻厓兜个左手片就係龜山島摎顏色當靚个太平洋，最尾，火車慢慢仔駛到了池上个火車頭，旁脣係歸片闊野野个禾田，親像在摎亻厓兜講這堂因為疫情關係，故所慢一年辦理个三日兩夜个東部田野考察課程，開始咧！
【好心个計程車大哥】
池上社區个根基 壯旺个公民行動力
三日兩夜个時間裡肚，先生安排三場演講摎一場導覽，內容都當豐沛，分人做得用已短个時間去了解池上社區个前世今生，邀請著大地飯店摎建興米廠个頭家梁正賢先生、池上國中退休主任賴永松先生、前臺電主任賴慶祥先生、池上文化藝術協會秋收組總召陳秋菊女士、中研院民族學研究所黃宣衛研究員、萬安社區發展个推手蕭仁義先生，還過有池上福德宮總幹事陳福春先生，恁樣大个陣容分人感受著先生个用心，亻厓兜實在還幸運。池上个人對佢兜土地該種熱情、珍惜，還過佢兜个公民意識、公民參與，都分亻厓深深感動在心肝肚。
佢兜做得為池上个環境、景觀共下團結起來，甚至係犧牲個人利益，淨為著摎池上个好分全世界知。亻厓看著佢兜為自家驕傲，倒轉來看臺灣西片个人敢有可能打造第二隻「池上」呢？亻厓想，在大家个公民社區意識還毋罅个情況之下，驚怕係一件當困難个事情。
【圖／邱淳榆】
南客北客 看著東客
第二日下晝係亻厓兜學生仔个重頭戲——田野調查！同學大部分共下做伴行，亻厓兜這組堵好係一個客家人、一個學老人，再過加上一個外省第三代个組合，恁樣个組合在四大族群各佔四分之一个臺灣東部嗄發揮了當大个好處。
堵著客家人，亻厓兜就派出客家同學講幾句客話；堵著外省人，亻厓兜就派出外省第三代出面講幾句話，透過恁樣个田野實作發現，語言摎族群背景確實做得當遽就拉近摎受訪者之間个距離，難怪有一句話講：人毋親，土親！亻厓兜乜在田調過程發現了數量較少个饒平客，這分亻厓對東部客家有更加深个認 識，雖然在文獻之中常透讀著臺灣東部有客家人這件事情，乜知佢兜个人數大約佔百分之二十五，毋過亻厓對佢兜个實際狀況顛倒係完全無了解，經過這擺个田野調查分亻厓知，東部个客家大部分係「再移民」，腔調分佈做得講係「四海大平安」都有。
就像亻厓兜最尾一日食暗个「翠華小館」，頭家娘就係大埔客！東部客家打忒𠊎過去對某一息仔地區个腔調為主流个印象，在這片不單淨係四大族群共下生活，更加係各種客語腔調結共下，乜分亻厓兜這兜遠道而來个南客北客，看著東客當特別个地方。
池上尞 尞池上 無畢業个畢業旅行
時間乜慢慢仔愛到了鳳凰花開个季節，這擺个池上田野考察課程對亻厓兜二年生个學生仔來講，顛倒像係一擺个班級畢業旅行，雖然亻厓兜之中無人做得準時兩年就畢業（笑），毋過大家還係帶等碩士袍，來到這人間天堂，漫步在伯朗大道頂項，吹等風，看等該青溜溜个禾田連等中央山脈，該係盡靚盡靚个天際線！亻厓兜在臺灣个東部，暫時攉忒學校个事情摎寫論文个煩惱，感謝先生安排了這擺个田野考察，亻厓想這擺个池上旅行定著係亻厓兜研究所生活裡肚最難忘个回憶。
【圖／曾淑珮】
