冰箱个生趣事
【文、圖∕黃美貞∕光復國小教師】
發音人：黃美貞（四縣腔）
大部分个細人仔放學轉屋个第一件事，就係開冰箱，看那冰箱肚有麼个好料仔，係熱天个時節，盡記得阿姆輒常念，毋好密密開冰箱，冷氣走淨淨，毋得電忒係無，緊開乜毋會變東西出來，講係恁樣講，亻厓兜細孲仔還係對冰箱有當多个想像，就算係吹一下涼，過願乜好。
現下人个屋下，有兩臺冰箱算平常，一臺冰菜同果子，一臺冰肉同魚仔，有兜人，還另外買一臺細冰箱冰涼水，毋過，在吾印象裡肚，還細个時節，屋下有一臺青色个兩門冰箱，頂高係冷凍庫，底下係冷藏室，盡底下有一隻拖仔，該時電視輒常做廣告，內肚擺等雞卵糕、汽水、牛乳、點心，還有鎖匙做得鎖起來，毋過，因為兄弟姐妹多，冰箱輒常係空空个，罕得看著點心，僅可用自家个飯篼仔做清冰，就試著異滿足了。
有一擺，亻厓去一間算來係臺北盡派頭个大賣場，裡背肚有賣電腦、音響、模型還有掃地泥機器人、人性化冰箱，逐樣就做來當精緻，像藝術品樣仔。亻厓定定仔行，慢慢仔逛，看著一臺有四隻門个大冰箱，外表係鏡面拷漆，愛用冰矻毋使開冰箱門，外背撳落去就做得哩。輕輕仔搉門，冰箱肚項會自動光起來，裡背有麼个看到現現，實在還利便，還餳人買哦！亻厓看價數同屋下該臺差毋多，就應倈仔講：「下擺換新个，就買這臺轉去。」結果，倈仔笑笑仔講：「你少算加一隻零哦！愛二十零萬箍正著。」害亻厓面紅濟炸當敗勢，遽遽行走毋敢講大話。
逐年番蒜大出个時節，𠊎會買歸箱仔番蒜冰在冰箱，無論係生食切盤、打汁做冰，總係毋罅塞倈仔个豺嘴空，家娘長透講：「亻厓食番蒜有要領，冰箱開一細縫仔，兜一張矮凳仔坐好，正手脣放一隻錫桶仔，左手拿青番蒜，還有冰箱个冷氣好吹，食到連出汗就變黃个。」亻厓相信該種感覺一定當暢快，十過歲个回憶一直到七十零歲，就還記到真真，家娘講到口涎波撥，就像前兩日仔正發生个事情樣仔！厥个孫仔斯聽到入文，一臺冰箱同三代人个感情串共下。
現下，亻厓毋會欣羨，冰箱有淰淰个好料仔，顛到係輒常拚冰箱，拚畁淨淨俐俐，食忒正買，因為，無論冰箱幾大就係試著毋罅冰，改變自家个想法，吾个大冰箱就在大賣場，單淨欣賞乜係一種幸福。
