學會吔麼个事(下)
【文、圖∕何承道∕國立中央大學客家語文暨社會科學學系一年級】
發音人：何承道（南四縣腔）
還記得年初一該暗晡，阿爸邀吔莊肚个朋友來屋下啉酒，炒魷魚仔、多蔥液粉、鹹菜豬肚湯、𧊅仔肉圓炸啊酥酥，淋上酸甜个汁，亻厓食等阿爸用心改良个手路菜，慣序个味緒。在一擺又一擺歡喜个斟酒、啉酒之間，亻厓影著阿爸該因為歡喜㖸啊目聚聚仔个眼角，多吔一條條个皺皮，一𥍉目，亻厓个心神像海湧，嘴項个味緒走棧吔，甚至變啊無鹹無淡，雖然提醒自家大過年毋好烏白亂愐，毋過面前个情景一下遠一下近、晃晃晃晃，一下仔看啊蓋真一下仔又濛濛看毋清楚，跈等一種解釋毋出个青驚，亻厓甚至於毋得知自家在緊張麼个。
酒席過後，等最尾一個人客歸吔，亻厓陪等阿爸在灶下仔清潔。亻厓佮阿爸問著該無來由个操煩時，總算，阿爸對亻厓講出吔幾下年前，某一個時空亻厓所熟絡个客話，該兜講毋煞个不褡不膝、屙膿滑血个時光，變啊一個佮亻厓共享親密的dagˋ秘密个存在，毋驚分人偷聽，乜毋驚分人知得。講著阿公，阿爸佮亻厓講為著愛證明從來攏無在厥身項有過个好，可以因為佢來產生，佢嚴條个教育亻厓，用亻厓个存在來佮厥爺哀緊喊。阿爸想愛離開家鄉去完成夢想嗄又思戀故鄉，這種減減裁裁个心情，分佢學吔恁好个手藝嗄又無出息。臨尾歸到山莊，帶等莊肚大人个該兜閒話，帶等阿公阿媽个落寞失望，討姐仔、降倈仔、成家，在山莊恬靜个歇等。
庰啊在話語間，亻厓看著吔阿爸當年在親情佮夢想个選擇之間還係堅定離鄉个表情，該為著想愛證明兜麼个憤慨、單人獨馬个後生形影，盡傪祖先渡海離鄉來臺開墾，在外鄉落地生根嗄又指望歸來當初脫離个原鄉。在時光个洪流，祖先來臺謀生个千辛萬苦像係束揫變做阿爸个身影，在原鄉外莊之間，堅持看輕之間，輕輕仔敨等大氣。
亻厓蓋像知得亻厓在驚麼个吔。歲月緊行前，阿爸个頭那毛越至蓬白，亻厓驚个係厥肩頭堪毋得再㧡起這屋下个擔頭，堪毋得再佮亻厓恬恬个承受風霜，堪毋得再煮加一項項感心又扯飯个飯菜分亻厓食吔。三十二年个距離岐嶇路遠。亻厓愐，亻厓可以做兜仔麼个。
亻厓偷偷仔試測想愛煮出該每擺收假歸宿舍進前，阿爸都會煮分亻厓食个炒麵。還細在阿爸脣口走上走轉，到兩子爺共下在灶下仔煮食，看阿爸炒吔論nun百擺个麵，亻厓假會著蓋像蓋知得所有步驟，毋過等到油鑊開吔火，愛炒料仔該下正感著無結無煞，分灶頭項个火舌同亻厓个信心聚概吞核，鑊肚个料頭淬淬滾緊㖸𠊎。亻厓乜齧等牙根緊貶勺仔，調味暖燒。阿爸應該係恁仔張个。應該係啦。最尾起鑊，壞食啊會死，佮亻厓想个有蓋大出入。一直都係，初先亻厓覺著該兜天經地義个好味緒，係阿爸無講出嘴个愛。
天頂對醹醹个吊菜色轉做水色，半山腰个地母廟敲等司鐘鼓，悠遠个聲在山林之間聽啊砉現。經過一暗晡个暢樂，臨天光个山莊十分削靜。亻厓䟘身，順等跏跏糾糾个路徑仔行到莊頭。天甫光。高大綿延个山林背項，日花晃來晃去，燦爛打花。
可能，亻厓毋係細人仔吔。
