講虛就無字
【文／羅肇錦∕國立中央大學客家語文暨社會科學學系榮譽教授】
發音人：羅肇錦（四縣腔）
虛个相對係實，故所詞彙有分虛詞同實詞。實詞係有實質意義个詞，像名詞動詞形容詞；虛詞係無實質意義个詞，在語言運作當中，淨有語法功能，無固定个也係確定个意義，像副詞（當盡異）、連詞（同摎）、助詞（欸呢）、聲詞（哈哈）。了解虛詞同實詞个差別，下背崖愛講个係學外來語言嘎下，主要係學別人个實詞，正用自家个虛詞來加減鬥出愛講个意思。故所文字化之初，就先借別人个詞別人个字來用，堵著虛詞全無字好借，高不將就拿別人个同音字來代表自家个虛詞，難怪各個方言个虛詞差毋多就係借音字。
講到這，又進入另一個問題。既然「虛詞差毋多就係借音字」，該就做得分析自家語言个虛詞，到底係哪種語言保留下來个，該就做得推斷客話係中原來个抑係南方語言來个。假使虛詞大部分係有音無字个借用，該客話就無係北方漢語系統个語言，因為係講客話係中原帶下來嶺南个話，今晡日客話个虛詞會差毋多同北方話个虛詞留留下來，毋會借用南方民族个虛詞來變到客話。
漢語係孤立語、膠著語、屈折語三大語言類型中个孤立語，厥基礎係單音節、無詞形變化，靠虛詞同實詞結合加上語序變化來產生各種無共樣个概念，像「無講話」、「無話講」、「講無話」、「講話無？」、「話無講」、「話講無」。故所上早漢語無語法研究，淨有虛詞研究抑係文字訓詁音韻定定。該當然，也無名詞、動詞、形容詞、副詞、連詞、助詞、聲詞等等詞類个分別。客話本來係嶺南當地个人講个話，有佢自家語言个特徵詞（崖你佢耳公頭那屎窟屋下埕下灶下）同表現自家語法功能个虛詞（當盡異同摎欸呢哈哈），同別族群人來往生活，自然就學當多別族个語言。初學嘎下，實詞大部分借別種語言為主，虛詞就用本來个用法（像給兜我、這正係、緊來緊重、崖斯當看毋慣、你不要陣陣腦傷、崖乜會、仰仔呢？）借共音漢字來表達。
慢慢仔，連特徵詞也借人个來用，像「老lo」本來係客話「人」个意思，背尾全部用人，老存著「孤老」、「死老」還有人用定定，過像「眏ngiang」本來係客話「看」个意思，背尾全部用「看」，「眏」存到福建附近畬話客話還有人用定定（臺灣饒平詔安客也還有用）。「老」同「眏」係實詞个借用轉化，當遽就會變人變看，毋記得哪個正係本來个話。毋過虛詞係功能詞，無實質个意義，故所僅可採借音字來用，較無恁遽變忒，故所現下客家話虛詞个用字，大部分算有音無字，小部分採用漢字借音用久吔就習慣成自然，毋記得本來係有音無字，毋記得係借音用个虛詞。
歸個仔綜合起來分析，今晡日客話个虛詞差毋多就同北方官話个用法用字無共樣，尤其大部分係有音無字，表示客話還保留本來南方特色个虛詞語音，毋係從北方來正借用南方民族个虛詞來變到客話。
