行在這條路項
【文、圖／邱一帆／國立中央大學客家語文暨社會科學學系客家研究博士班】
發音人：邱一帆（四縣腔）
行在這條路項
八角塔下有青春个望想
河壩肚項个大石頭下身緊磨
茶園項个魯冰花
生出靚靚个肥料
古阿明个天才
該當超越硬鉸个教育
人世間个屙糟應該
消失在江山萬里
像一蕊清白个流雲飛向四方
莫分人世間過一擺沉淪
在這條該行个路項
揇等奔妹个真心感情
毋會孤栖
揇等自家个公義理想
一路向前
像插天山頂个該條歌仔
緊唱緊大聲
緊唱緊入心
川中島个人會轉
臺灣人啊
總有一日也會出頭天
行在這條
孵出臺灣現代文學个路項
做毋得孤單一儕
行在這條
爭取臺灣客家權益个路項
做毋得孤單一儕
定著愛有人行共路
上輩个煩勞愛承擔
平輩个愁慮愛化解
下輩个望想愛牽成
有愛有惜，有惜有愛
臺灣文學之母个形象
臺灣客家个主體
恁真恁真
行在這條路項
婚前个愛戀
同歌德个苦澀相當
痛腸个結果變到酸甜个回憶
婚後个故事
寫出九妹个堅心同操勞
寫出臺灣人个苦難摎追尋
一隻一隻恁靚
一隻一隻恁餳人
2020.05.19
後記：用這首詩懷念分人感動、敬重个鍾老－鍾肇政先生。
