客語常用字在个討論
【文／范文芳／國立清華大學中國語文學系退休教授】
發音人：范文芳（海陸腔）
一、從字形結構講起
1. 古早个甲骨文時代，草從土地上初生出來，寫做才。
2. 後來鐘鼎文字，加土，表示在土地上生出草來。
3. 說文解字講解，在，存也。
二、 從構詞語法个角度，來看客話在字个特殊用法
1. 最初，在係動詞，語意係存在，客語常用句【有人在麼？】。
2. 從動詞个在，延申為形容詞穩定个意思，客話常用語【坐到在在】，意思係講坐著穩定自在。
3.客語專指不動產土地，安到【所在】。
4. 實詞个在，再活用為虛詞，多用為介詞，像【坐在樹下】，【行在路唇】。
三、 在字有當多音
1. 台華語比較單純，實詞、虛詞都音tsai/zai陰去調。台福語有多音現象，文讀音 tsai陽去調，白話音有di/de兩種，全是陽去調。
2. 客語在字有多音現象，下背來舉例說明
⑴有人在麼？音tshoi/coi陰平調。
⑵有人客來，妳樣還坐著在在，毋企起來？在音tshai/cai竹客陽去調，苗屏客陰 去調。
⑶坐在樹下，坐在教室肚，在係介詞，基本上係虛詞，客語就有當多語音，比像講di/de/dit/do/du/dut/te等等相近个字音，字音个聲調，非入聲就係陰去或 陽去，假使係入聲收尾，就係陽入調。
四、 感想同建議
1. 漢字个特徵，因為係單音節，故所同音字當難避免，比像講五、舞、武、午、侮，華語都同音，還好台福、台客比台華較好一點點。
2. 漢字還有另外一種特徵，就係一字多音，傳統語文教學稱破音字。最常舉出个例子，像音樂、快樂、敬業樂群，三个樂不同音。
3. 客話用漢字書寫，有人毋贊成同一漢字有太多不同用法，也就反對同ㄧ漢字，有太多字音，像【著】字，客語有著衫、著火、聽著。
4. 漢字【在】，客語可以有多種用法，也就有不同語音，裡本來就係語言文字个特質，實在毋使排斥。
