毋盼得
【文／黃美貞／光復國小教師】
發音人：黃美貞（四縣腔）
大个倈仔愛去美國一年，做交換學生仔，本旦恅著𠊎會盡毋盼得，無想著，厥爸同姐公當心愁，煩慮到無結煞。
自從倈仔讀高中，同老公个感情就越來越好，像係兩兄弟樣仔，兩儕剪共樣个三分仔，著共樣个運動衫，還共下打盡時行个網路遊戲─食雞仔，故所講倈仔大欸就愛分老公來管酌，實在毋係𠊎毋想管，佢兩儕自然就當有話講，當鬥搭。愛出國个避暑，老公帶等一屋下人去環島旅行，一路項唸唸唸唸：「做得同倈仔共下去尞，實在還湛哦！」
等到愛出國个頭禮拜，佢又開始千叮嚀萬交代，一儕人愛坐十過點鐘个飛行機，還愛轉機，深更半夜愛一儕人在機場等人來接，這全部係頭一擺，愛熟絡機場个路線，保護錢銀同自家个安全，講著口涎波潑，就驚倈仔會撞走。等著出海關該下，倈仔背等包袱仔，遽遽就行入去了，頭那乜無𢳆轉來。老公看到呆呆，連手就無擎起來擛一下仔，兩隻目珠含等目汁，強強嫲會跌下來哩！
倈仔係在苗栗出世个，從細就摎吾爸睡在架仔床，一直到高中就係恁樣，一儕講客一儕應國語，實在當生趣。這擺，孫仔愛去留學，阿爸講佢愛學用Line，毋識看著八十歲个阿爸恁認真，帶等老花目鏡，跈等孫仔學打字、用貼圖。該暗晡，倈仔愛出發哩，佢嗄食睡毋得，顛到自家个妹仔去外地讀書、嫁人，佢自從毋識恁愁，正經係「戇姐婆惜外孫，戇鴨公孵雞春」。過兩日仔，阿爸打電話來問：「毋知有慣無？𠊎斯日日就傳英文貼圖分吾孫仔哦！恁仰細人做得練英文，又會感受著燒暖。」
講實在話，倈仔識在吾肚屎歇十隻月，就像自家个一垤肉，做得看倈仔獨立，心肝肚實在歡喜，因為十六年前，𠊎就識同佢分開哩！毋過，做男仔人个，就算討餔娘，做事業，就還係共屋下个人，佢兜無該種毋盼得个經驗，會試著心焦焦，算來乜係正常个事情。
