女人的婚姻大事
【文／薛常威／國立中央大學客家語文暨社會科學學系在職專班碩士生】
媒婆：這間就係白家，𠊎知。裡背有人在無？
白父：麼儕來？自家落來。
媒婆：喊𠊎自家落去係呀？𠊎就落來去，無客氣喔。
媒婆：唉喔，白員外。
白父：媒人婆，坐等來坐等來。凳仔兜來，坐等來。今晡日仰恁肯行？麼个風摎妳吹到𠊎白家來。
媒婆：𠊎今晡日人講無事不登三寶殿，有事䟓工來。
白父：喔，到底麼个事？
媒婆：麼个事嘿喲？嗄毋知，該何家个公子講看着你个千金小姐生來仰般靚，看到佢斯，仰般想啊。喊𠊎做媒人，講你个小姐。嫁分何公子。
白父：原來就恁樣形。毋過，𠊎妹仔个婚姻大事，𠊎老人家主意毋得。愛𠊎妹仔主意喔。
媒婆：主意毋得啊，好啦，該無喊你小姐出來。
白父：女兒啊。
秀英：來了。父親，有什麼事情啊？
白父：今晡日，媒人婆來這位，講愛摎妳做媒人。
秀英：做媒人喏？𠊎做得摎媒人婆講幾句話無？
白父：做得做得。
秀英：媒人婆有請。
媒婆：還靚喔，莫怪何公子看着硬硬會昏忒去。還靚喔，小姐。
秀英：承蒙妳恁會阿𧩣𠊎，請問該對方个人品樣般形？
媒婆：講著對方个人品，講較毋好聽，世界一等个，一等个人才，無好嫌个。
秀英：既然恁樣形，敢不知俚人最要緊，買貨就愛看貨。但是，𠊎想愛看一下佢个人品到底係就妳講个恁樣形無？不如喊佢天光日朝晨八點身騎白馬遊𠊎个白樓，𠊎看着有中意，正來講親事。
媒婆：唉呦，敢愛恁功夫咩？
秀英：一定愛看着人，𠊎看着有中意，𠊎正會答應這門親事。
媒婆：恁樣好啦。
秀英：會為難係無？
媒婆：毋會毋會。
秀英：就照恁樣講。
媒婆：員外啊，你妹仔講，該何公子愛騎白馬遊白樓。
白父：好啦好啦，妳轉去準備。
秀英：麻煩妳。
媒婆：死無命咧。
白父：女兒啊，恁樣形刁難人做麼个？
秀英：父親，終身大事，係𠊎細妹人一生个幸福，恁重要个事情，一定愛小心謹慎啊。
白父：好好，婚姻大事係妳自家个，妳係恁樣，阿爸就順妳。
1. 䟓工dang24gung24：專程、特地。
2. 硬硬ngiang55ngiang55：硬要、硬是。
3. 阿𧩣 o24no31：稱讚、讚賞。阿𧩣，不知本字，從俗暫用。
4. 死無命xi31mo11miang55：糟糕透了。
