做旱
【文、圖／彭欽清／國立政治大學退休教授】
發音人：彭欽清（四縣腔）
舊年歸年仔斷隻風搓，當多人講臺灣實在真好福氣。
今年到今，雨水毋足，中南部好多仔个田水毋罅，愛休耕。當多果子乜受著影響，毋係無打，就係打毋結。
四月初仔，苗栗、臺中个部分位所一禮拜停兩日水。係再過旱下去，怕會停還較多日，還較多位所會停。苗栗縣肚有六座水庫，顛倒嗄愛限水，正經係：近河無水食，近山無樵燒。
八、九歲該下，有一年做旱，圳水溓溓，耕田儕愛輪等去陂頭放水入大圳，在水道頭起勢，耕上坪、下坪、國小面前各份田个人，愛輪等掌水汴頭，驚人偷放水。
聽老人家講，原在做旱時節，有人識半夜仔去偷扳汴頭，分人䀯著，一钁頭柄就𢫦落去同佢打死。
這也難怪，原在耕田个旦旦係佃農，無論有收成無，頭家還係愛收租。對佢這兜來講，無水好分禾仔好大來割，就係愛收佢一屋下人个命。有人偷水，就會同佢拚命。
莊項个人，水足个時節，婦人家就在下圳洗洗湯湯，行幾步腳仔就到得。愛食个水愛去伯公下个上圳㧡，愛上下一截仔緩緩仔个崎，來去成十分仔。做旱該下就無命了，上圳下去行一截嶇崎過一大截田脣路到石䃗，正降jiang到河壩底。
河壩水無流，伸一窟窟个水，用杓嫲定定仔舀到水桶肚，驚摝渾水。舀著兩桶正㧡轉去，毋敢行忒遽，驚水會激出去，一擔水㧡下來愛歸點鐘仔，㧡淰一醃缸，就愛食晝誒。婦人家愛洗湯乜愛去到河壩，尋較大窟个水來洗，愛亼愛洗愛扭燥來，有个還揹等大細去，洗好轉到屋就當晝誒，跈等愛煮食，正經當艱辛。
這下臺灣个水道水，大體仔哪就牽到到，洗身腳、洗衫褲、洗碗筷、沖便所，哪久愛用著水就便便。作當講限水，乜有水塔好囤水。就係用水恁利便，水費又便宜，大體人都毋曉得省。
有科學家算過，地球照現下恁仔暖化下去，二十一世紀毋使過半，當多地方就會大欠水，當多國家就會為著水資源打逆面相㓾。
將來定著會還較輒堵著天旱，政治人物愛會籌會算，好好規劃利用水資源，煞煞執行，分人民百姓正經試著有效。毋好單淨會出一張嘴，專門噴麼个前瞻計劃个口涎水，等到過誒年，還係無水食、無水耕。
愛知哦，夭壽事做多誒，會孤盲絕代哦。
