水牛書店
【文、圖∕薛常威∕國立中央大學客家語文暨社會科學學系在職專班碩士】
發音人：薛常威（海陸腔）
好讀書个人一定毋會毋知「水牛出版社」，在戒嚴時代出版當多小眾个書，黨外个，醫學个，分該兜當有自家想法个後生人看。創辦人彭誠晃先生在2012年摎出版社交分羅文嘉。羅文嘉一直有一隻願望就係在故鄉開一間書店，隔年2013年，帶有社會企業精神个「水牛書店」就在新屋中興路開始。
水牛書店乜係一間獨立書店，店肚歸面牆个書櫥裝淰淰个書，賣當多水牛出版社个書，乜有賣舊書，讀者做得便宜買著好看个書，當然乜做得拿自家屋下个舊書來交換，若係學生借新屋圖書館个書超過20本書乜做得直接換書，佢用這兜方式分書做得還較流傳。書店無定期會辦各樣个藝文活動，演講，手作學習課程，推廣偏鄉細人仔讀書个習慣。
羅文嘉還在新屋九斗村成立「我愛你學田｣，用有機方式種米，無用農藥、無用化學肥、無除草劑个自然農法，推廣好農文化，另一方面，佢拿這兜賣米賺个錢來推廣在地个偏鄉教育，開設免費个英文班，還過摎朱宗慶打擊樂團，逐年佢兜會尋兩間偏鄉小學，免費教學生打鼓。
另外，新屋當地種田人乜做得拿自家種个米、菜來書店，共下送到水牛書店-台北分店來賣，打開銷路，賺較多錢。
種田摎開書店應該係賺無麼个錢，毋過「水牛書店」用愛摎分享，社會企業个態度，連接都會摎鄉村个交流，這意義摎價值比賺錢還較重要。
