新街溪个生態景致（上）
【文、圖∕徐貴榮∕國立中央大學客家語文暨社會科學學系兼任助理教授】
發音人：徐貴榮（四縣腔）
新街溪同老街溪，係中壢市內最主要个兩條河壩，也係自古以來大家認為中壢老地名「澗仔壢」个來源之一。因為新街溪流過石頭庄个關係，頭擺安到「石頭溪」。相對於老街溪流過老街，安到老街溪；石頭溪流經新街，正安到「新街溪」。這兩條河壩在中壢市無相合，平行流到海，係有交會，中壢早就怕係大都市囉！
新街溪在龍潭三角林个北片發源，順等龍潭个成功路往北流，到平鎮金龍路、金陵路合口，經中壢龍岡大操場下，到龍岡路三段262巷同平鎮龍泉一街个滿庭芳橋開始，偎等金陵路脣，就係平鎮、中壢兩區个界線。一直到過忒玄天橋轉向東，到石頭庄伯公前，正完全在中壢區內。過經過中壢車頭、新街仁海宮前，水尾仔，高鐵桃園站附近，進入大園區內海里个北片入海。全長大約29公里，在中壢區大約12.8公里，算係新街溪中游个部分。因為地勢無幾高，到中壢正有「黃屋庄坑」、「上水尾坑」兩支支流流落新街溪，故所水流毋大，水源穩定，係無特殊个雨量，通常毋會發大水。
因爭新街溪係在中壢南片較偏僻个流域，無像老街溪流過市中心，較分人注意、注重。佢像一個無打扮个後生細阿妹仔，恬恬仔無發出麼个聲哨。新街溪分人注意着，係民國90年个917納莉風搓發大水。該擺風搓大雨，造成石門水圳龍潭段斷駁，大水順等這兩條河壩流往下，造成老街溪脣光輝二街有三棟五棧樓仔屋橫忒；新街溪這片大水翻過橋面，低湖个人家，家家浸水，後站健行路个街路屋就浸忒歸棧樓，還水浸中壢火車頭，講係200年來盡大个水災，電視、新聞大報導。
大約在該擺風搓過後，政府開始計畫整治新街溪，還愛在河壩脣做河濱步道，分人休閒、運動。又為着愛美化新街溪，用忒好多錢，在逐隻橋橋脣做「水岸光廊」。這水岸光廊，先從新街橋開始做往上，上去忠義、八德、福德、埔頂五座橋，從102年正月點燈起用。後來緊做上去。到今中北、東明、健行、東興、龍岡（圖1）、玄天（圖2）、紫雲這兜橋，一直做到中壢環中東路同平鎮環南路个合界橋，總下就看得着各式各樣，無共樣設計个水岸光廊。
圖1 龍岡橋个水岸光廊造型（2019.12.25攝）
圖2 配合橋脣玄天宮个玄天橋水岸光廊造型（2019.12.25攝）
這水岸光廊个設計各有特色，逐座橋就無共樣，像新街、福德兩座橋採用三隻圓拱形，八德橋用大圓拱形裡背還有星光點點緊𥍉（圖3），忠義（圖4）、埔頂兩座橋係用龍船造型。逐座橋个水岸光廊逐暗晡都會點光橋面，在暗暗个河壩頂高，五色个ＬＥＤ燈光輪流緊換緊𥍉，同河壩底下个倒影鬥搭，分來去个人有特別个感覺；在河壩脣个步道慢走、散步、行過，配合等河壩底下流過个水聲，分人試着當浪漫、甜美，想愛停跎，看加一下。
圖3 溝通溪洲街、元化路125巷个八德橋水岸光廊圓拱星點造型、步道、倒影（2021.04.27攝）
圖4 新街仁海宮前个忠義橋水岸光廊龍船造型、倒影（2021.04.27攝）
打爽个係到這下，像新街橋在當市个中壢入口（圖5），無逐日點光；埔頂橋人行道拓寬拆忒過後，無做倒轉去；有兜橋个字燈光無著，毋知主管單位有注意着無？
圖5 普義路新街橋日時頭看水岸光廊三隻圓拱造型（2021.04.27攝）
