肚飢食荔枝 肚飽食黃梨
【文／何石松】
發音人：何石松（海陸腔）
記得細人時節，先生常常講，愛飯後食水果。這幾年來，又有新介講法，講愛飯前食水果。到底愛飯前，抑係飯後食水果呢？這愛看係麼介水果，麼介時節，係能做到對象時辰介和諧，其實，全做得。該就係：肚飢食荔枝，肚飽食黃梨。
仰般飯前愛食荔枝，飯後愛食黃梨？這係為了兩句押韻，較好聽定定，毋係講飯前飯後一定愛食這兩種水果。本意係在飯前，愛食像荔枝牛眼這兜較有熱量介水果，可以補充養分，有飽足，正有精神；食飽飯後，就愛食像黃梨、西瓜這兜，較涼性，容易消化介水果，對身體較好。
聽講，頭擺有兩個人，愛出門做事，等到當枵介時節，一儕專門食荔枝牛眼，一儕斯食黃梨西瓜。過無幾久，逐日食黃梨，西瓜介人嗄人毋好，無精神；但是，該食荔枝牛眼介人，還身體已健，歸身有燒氣，仍然當有精神。
這意思係講，枵到肚屎變背囊介時節，毋好食熱量低，像黃梨西瓜介水果。愛食兜仔像荔枝、牛眼這兜果子，恁樣，毋單淨可以黏皮解決肚枵之苦，還可以提神醒腦。因為這兜水果熱量高，會使得歸身有燒氣，保護腸胃介燒暖，會產生動能，無形之間就有元氣，有飽足。斯像車仔加了油共樣，這兜熱量高介水果，可以講做得準做三餐食介功效。
荔枝，在漢朝時節安到離支，意思係離開樹枝一日，就會變色，兩日會變味，三日斯色味都會變。佢介熱量摎牛眼共樣恁高，歸日食也無問題。荔枝雖然皮皺皺，但是，瓤肉白雪雪，酸甘酸甘，又有兜仔甜滋滋，所以唐朝楊貴妃當好食荔枝，有詩講：「一騎紅塵妃子笑，無人知是荔枝來。」宋朝蘇東坡也逐日食荔枝，還講：一日愛食三百隻荔枝，永久都愛做嶺南人。
台灣係好地方，係荔枝牛眼介故鄉，有人講牛眼安到荔枝奴，其實，荔枝牛眼係好朋友，尤其牛眼還較能夠保鮮。荔枝性熱，食了可以防肚肌之苦；牛眼也熱，但，性平和，氣味甘甜，係補血定心介佳果，益脾長智介良藥。可以醫反躁心驚，頭暈腦貶，加強記才，固腎安神。李時珍講：「食品以荔枝為貴，資益以牛眼為良。」難怪分人安到「果中神品」啊！
講著黃梨，佢介熱量實在真低，在食飽以後，熱熱介時節，來一垤黃梨，可以消暑解熱！一般來講，食東西毋好暢冷，「燒斯傷骨，冷斯傷肺」，冷東西落肚，多少會傷害，但是，在食飽飯後，來垤酸甜酸甜介黃梨，實在係好滋味呢！人講：「黃梨頭，西瓜尾」一等好食。黃梨煮湯變甜湯，加上六月西瓜透心涼，正經係人間好滋味，食了會尋尾啊！
黃梨又係一等惜子介爺哀！看該黃梨全身有武器，係兵營，又像京城，二十四小時都在該保護佢介嬰兒，實在感心。毋信你看：「黃梨惜子最情真，鐵馬干戈向外伸；撫育紅孩幼面嫩，朝朝都望鳳凰身」，食了黃梨係毋係能夠飲水思源？仰做得可以毋食黃梨，佢係愛心介水果啊！
其實，還有盡多種水果，飯前飯後都好食。比論講：桑仔子。聽講漢朝劉邦，相㓾輸忒逃難到山肚去，無東西好食，頭那又痛，肚屎又枵，當在該腳底打脈――尋毋著症頭介時節，斯看著滿山介蠶仔樹，打著滿樹垂椏垂桍介桑仔子，無奈何，佢枵咧斯煞煞食桑仔子，無幾久以後，佢介頭那痛就好咧，無想著，桑仔子嗄變好藥方啊。
原來，桑仔子可以滋陰補血，明目安神，利關節，祛風濕，還可以醫療頭暈目暗，頭毛蓬白，腰膝痠軟等功效。佢醫好劉邦介頭那痛，可見，飯前飯後都可以食水果呢。
所以，肚肌食荔枝，肚飽食黃梨，牽涉著飲食介蒂頭作用，斯愛看麼介時節，食麼介水果，能夠飲食和諧，身體就會健康。
※此處的「介」為大眾通用的「的」，同教育部訂的「个」之意
