阿勇伯个議員人生
【文、圖∕黃美貞∕國立中央大學客家語文暨社會科學系】
發音人：黃美貞（四縣腔）
一般人對議員个印象就係，著一身亮線个衫褲，駛等名貴个車仔，講話个時節當有份量，選舉該下，區域个選區行透透，企在車頂高，緊同大家擛手，無就緊行緊拜託，雖然講係人民做頭家，毋過選忒以後，實在難得看著佢兜个魂影。毋過，在苗栗就有一個當親切，會親身去選民屋下服務个議員。
在苗栗嘉盛个胡屋伙房，就出一個連做七任个縣議員，大家喊佢「阿勇伯」，佢係阿爸个老朋友，後生就熟事，異輒共下做泥水事，阿爸整鐵牛車，佢做木匠。後來，細人仔去小學仔讀書，佢開始關心學校个事務，因為做人熱心，做事落力，一做就幾下任个家長會長，續下來就選市民代表、縣議員，一路選等上。
記得讀高中該下，六月天公晒穀个央時，阿勇伯來屋下坐尞，騎等一臺奧多拜，著等一領簡單个面衫同一雙球鞋，汗流脈落，全無派頭个身裝，𠊎兜一杯釅茶請佢食，佢笑笑仔講：「雖然無讀麼个書，字墨無幾飽，毋過，揢泥卵大个木匠乜做得為民服務，人愛對自家有自信，愛看重自家，別人正會看得起你。」
阿勇伯个客話講來當流利，又花當多時間去研究，比將講諺語、四句聯，佢做得隨來隨鬥，合鬥到當搭句，故所，係堵著討親个行程，佢定著會上臺講祝賀辭，配合厥个笑容同動作，輒常弄到臺頂新人，臺下人客笑連連，正經係鬧熱又生趣。堵著議會發言無就總質詢，佢定著通棚講客話，無人有佢恁岐嶷。佢講客家人就愛講客話，自家个客話愛自家救，恁仰客話正做得一代一代流傳下去。
阿勇伯無面書、無用新式个通訊工具，用行動電話講話聲音真真，又毋使打字係盡利便个，尤其係老人家用電話較慣，一通電話到服務乜到，堅持面對面溝通正有誠意。𥍉一下目，三十年就過去哩，雖然從今以後無法度再看著阿勇伯，毋過厥个煞猛認份个服務精神，係後輩人學習个模範。
