客家係今晡日臺灣社會个五大族群之一，也係臺灣研究族群議題時个重要對象，盡多學者研究族群議題時，差毋多都對「語言」、「認同」、「遷徙」、「政策」等方面做研究，毋過事實上臺灣各地常看著个植物－「構樹」，摎臺灣各族群个關係十分密切喔！ 「構樹」係雌雄異株个桑科植物，普遍生在臺灣平原、山崗，出現在廢耕田、細路脣、果子園摎森林个脣頭。「構樹」係佢个學名，毋過客語摎佢安到「鹿仔樹」，有兜客人乜會摎「構樹」喊做「敗家樹」，原來係家道中落，無人整理个庭院都會生出構樹，所以就摎「構樹」安到「敗家樹」。 在臺灣，構樹个雌花上粉後迸開紅色還略帶甜味，原住民族群會摎構樹个果實做點心，毋過有兜客人摎佢看做禁忌，世大人長透提醒細人仔毋愛採食構樹个果實，係無會「扡頦」（喉嗹頭會癢），因由怕係構樹生長係容易塌个位所，採食容易發生危險。 客人對構樹个印象盡像毋係當好，毋過構樹做得建構出南島語族个起源摎遷徙過程。臺灣大學个研究團隊發現，南島語族向外遷徙个過程，會緊帶等所需个生物，到該位就在當地種抑係養，各種植物摎動物就會透過南島語族个遷徙，散布在太平洋摎印度洋个南島語族个分布範圍內。 臺大研究團隊從構樹个遺傳情況，指出臺灣應當係南島語族个起源地，學者研究發現，南島語族分布个地方，植物大體係毋使種仔繁殖，做得經由扦插、樹頭繁衍，也就係講，太平洋个構樹淨有一種性別，都用樹頭種，無辦法自然繁殖，必須愛經由人類種；毋過臺灣个構樹摎太平洋上个構樹盡無共樣。 臺灣个構樹係結種正生，太平洋上个構樹都無法打花結實，毋過打花結實係臺灣構樹个正常情況，所以臺灣應當係南島語族个起源地，南島語族對臺灣遷徙到其他地區時，乜摎構樹帶過去，毋過淨帶了單一性別个構樹，所以構樹到其他位所就無法度進行有性繁殖。 構樹係臺灣當輒看著个植物，毋過就係忒輒看著了，倒轉分亻厓兜不足為奇，毋過構樹係解答南島語族身世个重要密碼，下二擺在路上抑係荒地看著構樹，切莫看毋起佢喔！
◆ 發行單位 ／ 國立中央大學客家學院 ◆ 榮譽發行人／ 周景揚校長 ◆ 發 行 人／ 周錦宏院長 ◆ 編輯顧問 ／ 王俐容老師、王保鍵老師、江俊龍老師、 周錦宏老師、姜貞吟老師、孫 煒老師、 陳秀琪老師、陳定銘老師、張翰璧老師、 黃菊芳老師、賴守誠老師、鍾國允老師、 劉小蘭老師、蔡芬芳老師、鄭曉峯老師、 羅肇錦老師。(依姓氏筆畫排序) ◆ 主 編／ 周錦宏院長 ◆ 執行編輯 ／ 陳秀琪系主任、黃菊芳老師、邱一帆老師、賴維凱老師 ◆ 編 輯 群／ 林芊慧、涂政強、梁萩香、彭淑姿、彭賢明、賴音如、賴亞華、羅雅鈴。（依姓氏筆畫排序） ◆ 刊頭攝影 ／ 廖千慧 ◆ 網頁製作 ／ 李岳哲 ◆ 連絡電話 ／ 03-4227151#33480
Alpha Preparation, Stand by
© 2020 New Edition Design by 李岳哲
