耳屎个故事
【文／羅肇錦∕國立中央大學客家語文暨社會科學學系榮譽教授】
發音人：羅肇錦（四縣腔）
近隻月來，編客語辭典个委員，又為著「屎」這隻字情吵到匏仔變爛杓麻。惱「屎」派个委員仰仔講就毋肯用「肚屎」「屎窟」來表示肚子屁股。本成派个委員提出講，耳屎、目屎、鋸屎、火屎、菸屎早就變到毋係講單純个「屎」，係講無用个東西个意思，無需要避開「肚屎」「屎窟」个用字。另外挶屎、屎牯、屎狗、還屎喔，既經變形容性个詞， 屎背尾、屎棍頭、屎棍條、屎桶樣也無係單純个「屎」◦可見「屎」个用法在客家話來講，有厥當長个歷史，當多个變化正留下來个。結果兩派人講毋會分漿，最背尾開放用法，惱「屎」派用「笥」，本成派用「屎」◦
吵到濃攪攪嘎下，本來想係毋係做得用猜拳來決定，無想著猜拳又有猜拳个麻煩。因為早期猜拳大家喊「石剪網」「網剪石」，一下猜拳就借國語个「石頭剪刀布」，算來愛用哪種較好，結果還係共樣，各有立場，講毋會分漿。以崖個人來講，當然保留本成个用法正係文化本色，係無，愛使恁煞猛去討論搶救客家文化个事情。故所愛用「石剪網」抑係愛用「肚屎」正係保留客家文化，係講為著大家就會个，抑學較遽个，採用國語个「石頭剪刀布」，無就用罕得用著个古漢字「笥」來寫「肚笥」，該敢毋係緊摵緊大棚。講忒 「肚屎」崖又想著另外一個當有文化个「屎」，該就係「耳屎」◦
「耳屎」，大家就當熟識，尤其若个手指尾同耳屎盡熟，食欸閒閒就會去挖耳屎。根據手指尾公會个統計，一般人个耳屎做得分兩種：一種係「油耳」，一種係「糠耳」（民間木匠師傅講苦楝樹也分「油楝」與「糠楝」，「油楝」有油性材質較好，「糠楝」材質鬆散較無用）。先講「油耳」，因爭「油耳」同手指尾个交情較好，故所手指尾挖一下，油耳就會分一息油水匟在手指甲，帶出來个滑滑黏黏个油水就係油耳屎，愛靚个手指尾就會遽遽拿來捽忒莫分人看著。崖識聽過異多人講，油耳屎毋使挖佢自然就會流出來，拿紙捽忒就好了。係「糠耳」就無恁好性，輒常手指尾挖歸半日就還抓無頭搨，有兜糠耳平常挖無耳屎，手指尾閒閒，久欸嗄毋記得挖，等到想起來愛挖，嗄塞到歸耳公像糠仔个耳屎團，還較嚴重个糠耳屎結到歸矻仔，塞到耳公聽毋著，正去拜託耳科醫生同你挖忒正聽欸著別人講話，故所崖講手指尾同糠耳个交情無油耳恁好。
挖糠耳屎崖又想著小學嘎下，學校教學生仔，平時愛「保密防諜」，毋好聽信別人講个謠言。其中有一個當好笑个故事講：有一個剃頭師傅同人剃頭合挖耳屎，結果在人个耳公肚挖出來个糠耳屎像雞毛菇仔恁大，結果一傳十，十傳百，到背尾緊膨緊大，變到講剃頭師傅在厥耳公項挖出一隻雞子，堵堵附近又有一儕人毋見忒一隻雞仔，強強賴這隻剃頭挖耳屎个人，講佢偷厥雞仔。
挖耳屎挖出一矻糠耳屎，做得變到挖出一隻雞仔，大家試著這係全無道理个事情。但係「肚屎」同「肚笥」哪個正有道理，崖想這也係大家就知个事情。
