惦惦來讀詩
【文、圖／鍾榮富／南臺科技大學應用英語系講座教授】
發音人：鍾榮富（四縣腔）
今年春天都還忙得時走，天時煞旱到佇毋著，又熱又燥。打開報紙，世界真毋太平，紛紛吵吵，總係人間个自尋煩惱。常時開會，行入會場，同樣吵吵鬧鬧，各有偏見，各有堅持，想起彭欽清教授寫个「心結同硬頸」，讀來實在感想盡多。「心結」看毋著，解毋開，纏啊在心中，糾纏到變死結。表現在外頭个係「硬頸」，大聲、敖蠻，總愛所有个人都愛聽佢个話。毋過，這兜滾滾紅塵个世間事，本來就係幻相，如夢、如電、如山影、如花香，輕風一吹，渺渺茫茫，不過係短暫个夢幻泡影。有相就有幻，想起陸放翁的「一千五百年間事，只有灘聲似舊時」。古今多少事，盡付笑談中。
在這个又熱又涼，毋知愛仰般過日个時節，堵好邱一帆先生傳來短短幾首詩，讀來像清風、吹散了心中多少苦惱。暗夜一來，將門打啊開，送出所有个煩囂，坐啊在書房，係惦惦讀一首一帆个詩。
鄰舍一條貓仔離家出走無想轉屋佢講屋下忒多人（貓）毋合忒吵尋恬靜
貓屋合仄仄哩，只要毋合個人（貓），多一隻就感覺著多，感覺到塞。難怪想愛離家出走，毋想花半分鐘同這兜人（貓）溝通。貓仔恁仔自愛惦淨，主要想愛尋自家个想法、看法，孤單一人，逍遙過日仔，總比同合毋得个人(貓)歇共下，譴啊在心中，每日面杜杜。
別人（貓）看佢，可能感覺著孤獨、感覺著無聊，但係出走个貓仔心中應該盡平和，雖然係荒山孤屋，可能心中無麻个操煩，無一點煩惱。「毋合忒吵」，不只貓仔，連人麻共樣。行出人群，到位都係人，有人擦汗，有人納涼，但係看來看去，合異著个同學、夥伴、同行，盡無幾儕值得做朋友。這就係日本人筆下个「浮世繪」現象。
讀一帆个詩，心中一片清涼，腦中一片澄明。所有个世間亂象，不管係吵事抑係天旱，可能都係各有「業」主，就像佢另外一首短短个詩
天災抑人禍還係麼人个毋著人生个悲痛
一兜人共下做計劃，執行想愛做个事頭，堵好有一儕合毋忒，三言兩語，又拍桌又拍櫈，氣噗噗在該大細聲，也毋知「還係麼人个毋著」。
