三文魚作亂
【文／黃美貞】
發音人：黃美貞（四縣腔）
恁久電視新聞報導，有當多後生人為著食免費个三文魚壽司，就去戶政事務所改名仔，兩下半就有三百儕。臺灣一旦無鮭魚這種魚仔，係用英文翻過來个，喊做「三文魚」，無想著郭鮭魚、劉鮭魚、李鮭魚這兜奇怪个名仔，在網路項嗄緊來緊多，有兜仔名仔還有四十隻字，連外國个電視臺就來採訪，正經係一個當奇怪个現象。
有人講：「名仔係爺哀對子女个祝福！做毋得濫糝改。」有影，當多老一輩客家細妹安到滿妹、招弟，就知妹仔降多了，下一胎想愛降倈仔。無就算命仔排命卦，這細人仔欠水，就愛取有水个名仔，阿清、阿海。毋過，這間日本大公司當有商業頭腦，算準現下後生人个心理，改一下名仔做得湊伴共下去鬧熱，做得賺一大張桌个美食，佢試著當值，等到食忒正改轉去，乜毋係難事。
乜有一種講法係「從眾」个作用，看到別人得著好處，自家係無拿著就了忒了，成時有店仔開幕送一碗魚丸湯，長長个人龍在街路頭跏跏糾糾，輒常看毋著排到哪兜仔去了。在臺灣改名仔正八十箍定定，公務人員又親暱暱仔，一生人還有三擺个機會，無用就打爽忒哩。係講，另擺係名仔肚項有蝦公、毛蟹就做得食到飽，驚怕又會有一千擔人愛無閒洎杈哩！
講實在話，這間日本公司雖然賺著當大个廣告效益，毋過，造成社會个動亂，浪費社會个資源，實在愛通棚來檢討，一個好公司毋單淨愛為股東賺錢，乜愛思量自家个社會責任，毋好為著一時个利益，就分社會大眾留下微利个印象，恁仰算來係賺還係了，就分時間同消費者來共下證明哩！
