印記
【文／徐佳妤／臺北市國小客語支援教師】
發音人：徐佳妤（南四縣腔）
輕輕仔摸等面項个色斑……
還細，照鏡仔看等自家个面：大大个雙瞼目、白淨个皮膚、紅紅个嘴脣，毋過……「阿姆，做麼个吾面項會有烏斑？」「𠊎乜毋知，可能係𠊎擐大肚个時節，對腳踏車下來，毋堵好撞著車頭，你一出世，面項就有了色斑 ，好在喲，毋會蓋大跡。」阿姆講。
記得讀小學个時節，一個細倈仔同學講：「若面若係無這色斑，就會蓋好看咧。」𠊎無想愛襯伊，心肚愐：吾面好看毋好看，無若事情，正經係三隻鼻公空 。一直到高中，總會有一、兩個同學好奇問：「若面仰會有……」每擺有人問起，自家總係慍慍悴悴、一肚屎懊惱應：「這係床公婆做記號啦！」同學知吔，就無再過問。
吾色斑生在左片个面頰卵，有人講：左片面項有色斑，表示係一個蓋熱情个人，對事業、感情當重視，毋過較少受著前輩个牽成……色斑生个位所無共樣，就會有不同个命運。講得著，抑，毋著？只有自家最知。「色斑」有蓋多个傳說，有人講係神个印仔，又有人講係前世留下來个疤，抑係上帝分人个等路。其中最靚个傳說：色斑係愛人流下來个一滴目汁變成个，這生人愛帶等色斑來尋戀人，再延續還毋曾完成个緣份，唉哉，仰會有恁浪漫个傳說呢？
曾經，系主任同𠊎講：「你面項个色斑像係保護色，恁仔，人，正會看著你个內涵，毋會淨看若外表定定。」受著主任這兜話个影響，𠊎，毋識搽粉打面，單淨搽化妝水同面油定定，一直到食頭路正開始打扮。先搽粉底液，過用遮瑕膏揞等色斑，再用粉餅、蜜粉，最尾，搽息把仔腮紅，分自家看起來過有精神。
「先生，若面仰會有烏斑？」啊，打了粉，還係揞毋核學生仔金金个目珠。𠊎應講：「這係色斑，一出世就有吔.....」話還毋曾講核，伊黏時就走去尋同學搞咧，下二擺有機會愛同伊講：「先生毋係靠『面』來食頭路，毋好淨注意先生个面啦！」
恁久，老公識問𠊎：「你會想用雷射除核色斑無？」「弄擺有想過，毋過今嘎嗄毋會想咧！」下後，若係又聽著：「若面仰會有烏斑？」𠊎會自在个應：「……這係，過身吾姆留分𠊎个──最幸福个印記。」
