世間落仔多
【文、圖／彭欽清／國立政治大學退休教授】
發音人：彭欽清（四縣腔））
上隻月轉老屋掛紙，聽吾哥講一個親戚分人落忒千四五萬，山園賣淨淨，佢自家閼，細人仔也閼，搣到子爺無講話。這個親戚盡篤實，打早就去園項做事，臨暗仔正轉，盡少過家尞，無麼有加講話。
落佢个係外位人，在街項贌屋歇，逐日就著等sepilo，結等negudai，打扮到派頭派頭。一起勢，佢請隔壁鄰舍來屋下食茶食菸，再過尋大家打鬥敘，下擺仔湊大家去遊覽，路項會請大家去飯店食。大家就講佢已喜客，相賽紹介親戚朋友共下來。大家緊輒共下坐尞食飯遊覽，就緊熟事。
一個同該儕人已置腹个人偷偷仔傳話講，這儕人有一個朋友生理做已大，下擺仔臨時及急愛現金環一下仔，出已高个利子，佢識試過，利子正經比銀行个貯金高加當多，除忒盡知己个，該儕自家無儘採開嘴借。
這個親戚就係恁樣變到該儕人个知己，同自家貯金簿仔个錢領領忒借佢，利子正經當高又分來煞，成年仔就領著歸十萬仔。看著恁該賺，佢就去同親戚朋友搬錢來放利子。
無想著成半年仔過後，利子會拖，講係做生理个朋友手頭較緪。就恁仔，這個老實伯緊行緊兼安山豬吊个位所，盡尾就著吊分人扛去㓾大豬。總下分該儕人落忒千四五萬，同親戚朋友搬个錢愛還，無法，就同山園䢍淨淨來拆債。借錢分該隻落仔該當時，無打字，愛討乜討毋轉。
落仔个英文係confidence man也做得講con（信付得个人），意思係講做落仔个人，愛分人試著係盡置腹个人，講麼个就信得。中外古今，大落仔、細落仔大嫲堆。米國个小說家Mark Twain个“頑童流浪記”肚項就有寫著兩个大落仔（con artist）分人捉著，歸身仔膏馬膠，黏等雞毛鴨毛這兜，䌈在枋仔項，放到大河壩分水打。
這下係法治時代，麼个就愛講證據，會做落仔毋會講偷食毋曉捽嘴，故所作當落仔分人捉著，乜毋會判已重个罪。臺灣有一駁仔出盡多電信落仔集團，騙盡世界各地个人，毋過正經分法院判刑个極少。這下人麼个就愛靠智慧手機過網路，落仔還較橫打直過，怕無幾多儕毋識接過落仔打个電話，搣到治安單位時時愛提醒百姓愛仰仔正毋會分人落。
這下个世間，細落仔管毋著，大落仔做大官。見擺選舉該下，逐個候選人就講到大空啦啦仔落選民，等選啊著，就變到政治落仔集團，愛錢有錢，愛權有權，食好、著好、去哪就有人服侍到好勢好勢。
做落仔有恁好空頭，莫怪世間人相爭愛做落仔。
