美好農場生態園區
【文、圖∕薛常威∕國立中央大學客家語文暨社會科學學系在職專班碩士】
發音人：薛常威（四縣腔）
在桃園龍潭高平社區有間「美好農場生態園區」，摎當多个休閒農場共樣，做得露營、烤肉、生態導覽、辦活動還有一間餐廳做得食飯。裡背肚有種做苦茶个苦茶樹，雞油蛄當好食个白雞油樹，還有四月時開到當靚、當茂盛个紫藤花。除忒雞、鴨、孔雀，乜有當好運分人拈轉來畜个流浪狗、流浪貓。
園區肚還有本來係雞寮、豬寮个磚頭屋，整理變成展示个空間。有古早个灶下，乜有以前客家婦女个間房，有梳妝臺，衫櫥，還有裁縫車。外背壁頂還有志工畫个田園生活个壁畫，實在當靚。
其實最無簡單係裡背肚个「美好庇護工場」，這位請有15個身心障礙个朋友，日時頭，佢兜就在這園區肚自家做堆肥，用自然農法來種青菜，無用農藥，乜無用化學肥料，這種青菜健康又好食。農場肚个每一間溫室，一擺共下種六樣菜，分大家來做愛心，訂購个人，每隻禮拜做得食著六樣新鮮个青菜，這兜青菜乜係園區餐廳个新鮮食材。賣菜得著个利存，正分這兜身障个人過生活，為弱勢族群創造就業个機會。希望做到「一菜益生，翻轉此生」。
「美好庇護工場」个創辦人余玉蟬董事長在1996年，該央時，社會大眾對心智障礙無當瞭解，佢成立「美好社會福利基金會」來照顧心智障礙个朋友。好得，該下農地無恁貴，正有機會買地成立這間農場。經過這二十零年个打拚，社會對心智障礙者變較友善了，毋過還係希望藉由社區活動个參與，分還較多个身心障礙朋友漸漸行入社會、回轉到一般个社區環境中，包括讀書、做事摎生活，就像恩俚大家个生活共愛，有關愛，無排斥。
下二擺，大家做得來這農場行尞下，乜做得摎佢兜訂購新鮮、無毒个青菜，支持這兜身障个朋友。
