春到莒光公園 櫻花鬧裁裁
【文、圖∕徐貴榮∕國立中央大學客家語文暨社會科學學系兼任助理教授】
發音人：徐貴榮（四縣腔）
莒光公園（圖1）係中壢後站一隻有名个長條形櫻花公園，位在信義里同普強里之間，黃屋庄坑在中央穿啊過。逐年个二月中仔，春到莒光公園，歸隻公園个櫻花就開到鬧裁裁。（圖2）
圖1 杭州路同莒光路脣个公園標誌，櫻花堵堵開（2021.2.9攝）
圖2 春到莒光公園，櫻花開到鬧裁裁。（2021.2.12攝）
在二十零年前，這還係都市計畫伸个地，無人去插佢，滿哪仔就荒草野花，屙糟垃圾，坑水臭肨肨。社區人士看毋下去吔，大家就出錢出力，煞猛整理，建議做公園，得着當時中壢市公所个同意、扌帣手，整治坑水，做各種運動設施。還有里長、志工時時个除草淋水，維護衛生。這下正有恁靚、恁有特色个公園，分大家休閒、散步、搞尞、運動。
該當時，社區民眾看着莒光路同幸福街合界个所在有兩頭山櫻花，試着平地生得起櫻花，就開始種，定調安到「櫻花公園」。逐年用有限个里長經費，一年種十過頭仔，一開始種山櫻花，毋過後來改種平地較會生个八重櫻，故所這下200頭櫻花，差毋多就係八重櫻。逐年到櫻花開个時節，紅花染到歸公園，倒影倒到坑水肚，連坑水也分佢染紅吔！這幾年，暗晡頭加裝彩色燈，轉換色彩，還較有一番景致哦！（圖3、4）經過報紙、電視一報導，莒光公園个靚同名聲，就像山下个武陵農場，毋管遠抑近个人就知。尤其到尞日，公園肚个紅男綠女、老嫩大細，來賞花、翕相、打卡、野餐个人，掖麻掖米、人尖人極，還有人來拍婚紗哦！
圖3 夜間燈光照射下个櫻花，更有一番特色。（2021.2.12攝）
圖4 夜間燈光照射下个櫻花倒影，脣項个星點係紫馬櫻丹。（2021.2.12攝）
公園个靚花，毋單止櫻花定定，還有坑脣輸人毋輸陣个紫櫻丹（紫花馬櫻丹，圖3、6）跈等開，吊菜色个花開到歸坑脣、坑壁項，攬攬吊吊。等無幾久，坑脣兩片个杜鵑花又開吔！熱天過忒到十月，棚架頂个蒜香花過來襯鬧熱。（圖5）行過「小橋」，毋使緊搐搐，停下來企到橋頂，看公園清幽青綠个景色，橋下个流水倒影，聽陂頭細水沖「報報滾」个水流聲，看步道來來去去散步个人影。每一時、每一刻、每一擺，朝晨、當晝、暗晡，都有無共樣个心情。（圖6）
圖5 棚架上个蒜香花（2020.12.26攝）
圖6 小橋流水、陂頭水沖、倒影、坑脣壁項个紫櫻丹（2021.3.3攝）
公園頭前，杭州路同莒光路交接个噴水地，逐日下晝四點左右，就會噴水，大管、細管，有時噴高、有時噴低，餳着當多細孲來搞水，也係公園个一大景色。（圖7）朝晨暗晡有當多人在該脣頭賣菜、做生理，形成一隻短暫个菜市仔。
圖7 噴水个所在（2020.12.26攝）
公園四片，高樓大廈、社區街巷相連，來這散步、運動个老人家，聽佢兜講話，大約有成半仔係客人。緊想：這公園過加二十年，春到公園，櫻花應該還係恁靚、恁鬧，毋過，毋知還聽得着幾多人講客啊？
