逢人且說三分話 未可全拋一片心
【文／何石松】
發音人：何石松（海陸腔）
逢人且說三分話，未可全拋一片心，意思係講在人心難測介複雜社會，堵著生分人，講話一定愛謹慎小心，毋好儘採講，尤其毋好分笑面虎介甜言蜜語騙著，分對方介利益餳著，一下仔就拋出大片介真心，或者獻出當純介感情，一失足成千古恨，再回頭已百年身，到頭來，行到鏡花水月虛幻境地，該就菜籃㧡水無採工，刀切甕菜兩頭空。長籮䈪顧得西來又偏到東，渺渺茫茫一場春秋夢。
這句話實在係社會經驗豐富，刻骨銘心之言，其實係講愛謹慎人際關係介意思，斯像「食菜愛先嚐嚐看，試燒冷；講話愛先想想看，知頭䌈」共樣，因為「水潑出去就收毋起，話講出去就追毋轉」「言多失語，食多傷肚」，這係循序漸進之道，毋係對人不忠之意，所謂三分，實在係愛少言，慎言小心，甚至不言之意。
逢人且說三分話，斯係試鹹淡，摸石過河之意。驚怕對方聽毋落自家介話，所以慢慢仔去試。聽講頭擺有人推薦范雎分秦昭王，佢兜雖然見過兩擺面，但是，范雎總係毋講話，使得推薦介人當無面子，該係因為秦昭王無心聽佢講話，佢就無麼介愛講，推薦介人了解咧，就去摎秦昭王說原因。果然，在第三次見面時，昭王單獨一儕召見，當專心客氣介聽佢講，聽到當入文，當感動，還特別封佢相國，范雎恁會講話，由淺入深，毋單淨自家步步高升，還使國家越來越強，正經係一言興邦，難怪漢朝介崔駰斯講，「交淺言深者，係當戇介人啊！」唐宋八大家介蘇東坡也講：「交淺言深，君子所戒」，係講麻布洗面──粗相拭(初相識)介時節，毋使講恁多，就係三分話，這係君子一等愛注意介事情。
不過，理學家朱熹反對這句話，認為逢人且說三分話，係對人毋忠。這就愛看對象仰般來論，像伯牙摎鍾子期，管仲摎鮑叔牙，有永遠講無忒介話，尤其係鍾馗摎杜平，初見面就變為置腹介朋友，還特別將老妹嫁分佢，像恁樣介朋友，實在難得，仰止講三分？所以，逢人且說三分話，就係驚怕堵著不忠不仁不義之人，還過乜愛看自家有正也無正。
上京舉子李甲，用了三百兩銀贖轉教坊院內介杜十娘，兩人非常歡喜介坐船向南愛轉故鄉。半路上想著從此以後，可以逍遙快樂介過日仔，斯暢到奈毋得，兩儕就利用清江明月，夜深無人介時節，在船頂山歌溜天唱起歌來，無想著嗄分隔壁船介鹽商孫富聽著，斯想盡辦法愛見唱歌介人。
李甲堵著這隻生理人，一下仔就交淺言深，講出自家介心事，原來佢用一大身家贖來介美人，係京城當有名介歌女十娘，當驚這擺轉去會分厥爸責備，毋知仰結煞正好。
孫富了解以後，斯有將十娘奪為己有之意。就唆慫佢講：「若爸無歡喜，全係你貪戀煙花，係隻浪蕩子之意，係講你空手轉去，尊親一定當閼，毋當你割忒夫妻之愛，亻厓送你一千兩銀拿轉去，保你家庭和樂。毋係亻厓貪十娘美色，實在係為你好啊！」
李甲果然逢人講出十分話，毋知對方假意抑真心，就完全相信孫富，愛摎十娘讓分佢，十娘強忍哀傷，想著自家對人付出一片心，嗄換來十分傷心情，正經係古井燒香──暗出煙(冤)，咬緪牙筋，心下就決定這係人生介大行嫁。
第二日，十娘打扮到嫦娥下凡樣，三儕在船頭見面。十娘兜出百寶箱，喊公子來看，第一層係翠玉明珠等，拿起就掉入水竇肚，又打開另一箱，也係玉簫金器，又一箱係古玉金釵，值歸千金，又一箱係夜明寶珠，金銀財寶，珍珠瑪瑙等，全部掉落江水之中。
十娘全部丟忒以後，就大罵孫富：「孫富啊！亻厓看你石上種竹無正根，看你毋係正經人。亻厓摎李郎經過千辛萬苦，正到今日，無想著你嘴甜舌滑，用奸言邪語，破人婚姻，亻厓死後有靈，一定尋你輸贏。」接等罵李甲：「李甲啊！你花紙做衫──假排場，你紙糊燈籠──無心肝。亻厓風塵幾年，有兜私家，自遇郎君，就望白首偕老，地久天長，𠊎箱肚百寶，不下萬金，全部為你愛見爺哀，還過日後用介，無想著你半路變心，為著一千兩銀就出賣餔娘，斯恨你有眼無珠，這下眾人有目，共做證明，係你無情，毋係亻厓無義啊！」
話講啊忒，就向無邊大江一跳，一時雲暗江心，浪花噴天，十娘已經三魂渺渺，七魄茫茫啊！
正經係：逢人且說三分話，未可全拋一片心！
※此處的「介」為大眾通用的「的」，同教育部訂的「个」之意
