學會吔麼个事(上)
【文、圖∕何承道∕國立中央大學客家語文暨社會科學學系一年級】
發音人：何承道(南四縣腔)
水，炙燒；波，在燒壺仔下挾等。行李收揫，準備去大城起你个夢。溫度漸漸仔升高，透亮若金个波緊跈等愛上來。決定前，阿姆望你做得留啊莊肚仔。波，一佇毋著，一粒粒仔相爭舂去水面項，必析。無定無著、減減裁裁，正會留下後悔同遺憾，故所你離開故鄉。
生麵落鑊，日頭封等个記憶分燒水熝醒。踏入車廂肚，同山莊緊行緊遠。撈起熟麵，落鑊同炒，進前忒多苦、甜、悲、喜，聚概攪做一團，落油蔥、豆油、胡椒，用爺仔情調味，淋一層薄薄仔个辣油，用期望菣香。在紛雜个路項，亻厓蓋像看著吔麼个……。
在外背生活吔六年，亻厓早就同宿舍做屋下。該時節，大考緊逼近，拜六、禮拜都愛加課、自修，久久仔一擺等到連假正做得歸。心肝肚合等屋下个愁緒，在白淨个筆記本項，亻厓割出一隻字一隻字个思念，決定敲一通電話歸去講兜仔麼个，毋過聽著阿爸个聲，想講麼个嗄講毋得出，兩儕人在冷削中，電話掛忒仔。亻厓戴等教養个面殼應對大人儕，煞猛愛做佢等心肝頭个細人仔，敢係恁仔？
記得高一寒假阿公過身前，該日暗晡歸家人遽歸去山莊老屋下，守啊阿公脣口，平常時嚴條个阿爸難得展現吔溫柔，用細杯仔承等溫燒个水，一調羹一調羹定定仔飼啊阿公嘴角，陪等佢黏時愛過身个阿爸，度過漫漫長夜。對後生到中年，佢都無同自家个阿爸好過。毋過，準著該下仔十八歲个阿爸知得，三十年後自家个爺仔會離開佢，佢會改變無？
亻厓等都因為後生覺著蓋會著仔，嗄毋知爺哀在脣口跈等，定定仔用青春刺一地光陰分亻厓等好掖。下後大吔，離開山莊去外背求學，添放核阿公阿婆在莊肚仔種个蓋大片甘蔗園，添放核在伯公下後背偷摘番檨時，揚葉仔爬啊手背項个畏肢，添放核莊肚仔該頭頂項滿蟻公个老牛眼樹。
還有，添放核客話仰講。
註解：
減減裁裁：音：kamˊkamˊcaiˇcaiˇ；猶豫不決。
冷削：音langˊ xiogˋ；冷清。在此指寂寞。
準著：音zunˋ doˋ；如果。
畏肢：音vi ji；搔癢。
