無時恬个膨尾鼠
【文、圖∕邱鴻春∕國立中央大學機械工程學系碩士】
發音人：邱鴻春（海陸腔）
記得細人个時節，戴在莊下泥磚屋，逐日滿山走，無愁無慮在該搞，屋脣有一片个相思樹園，常摎鄰舍細人仔共下落去搞，熱天時節，還有人會來收蟲包仔，這蟲包仔可能係草鞋嫲1變个，大家細人會尋長竹篙來揰下來，拈拈做下歸包，會有人來收，乜毋知該人收去愛做麼个，反正賣有錢就好，毋管佢恁多。
樹園裡肚搞，下把仔會看著蛇哥、蟾蜍，還有一兜鳥仔，毋過該下，像人毋識看著有膨尾鼠，但係老鼠就有盡多。
顛倒這幾年來，抝蠻輒看著膨尾鼠，常常在公園裡肚，抑係阿姆菜園脣頭个樹頂，也下把路頭路尾乜會看著，想想看，應該係這下人，較有保護動物个觀念，無像頭擺較早个人，大部分較窮苦，錢銀較無恁方便，食个油氣也無恁足，可能捉去賣，抑係打來食，所以該量時細人，較難得會看著這種有好價數个膨尾鼠。
前兩日仔，駛車經過一位較多樹个路，看著膨尾鼠在電線頂行過大路，這電線係又細又長，盡驚佢會跌下來，好得佢有大膨尾，做得盡襯頭2，毋會打孔翹，係天生行單木橋个高手，雖然行著踜踜蹭蹭，還係盡派頭平平安安行過去咧，你看膨尾鼠有慶無？有精無？
佢會行天橋過大路，無像蛇哥、老鼠、蟾蜍，下把仔還有鳥仔，通盤毋曉得仰般來過大路，長透仔會看著，分車仔撞死輾綿个情形，看著實在盡痛心。
轉頭看看崖俚人，係萬物个主宰，一定愛好好來守規矩，毋好來緊搐搐過大路，老人言講个，唐山老虎臺灣車，無半點耗漦，千萬愛來注意。
尤其較莊下肚个大路，盡多還係無紅青燈个，過大路定著愛看兩頭無車，正做得遽遽行過去，較街路肚，係有天橋也係有地下道，乜做毋得偷懶，一定就愛行天橋抑係行地下道，正會安全。有紅青燈个路口，定著愛等青燈正做得過，還過一定愛行斑馬線，千萬做毋得儘採在大路穿阿過。
大家共同來做一隻守規矩，一等个好公民，分世界人來認同臺灣，雖然崖俚臺灣个所在，有較狹兜仔，車輛又多，還係共樣做得，過著非常个方便，非常快樂又平安个日仔，毋好分膨尾鼠來看笑話，你這兜人，毋曉得過大路，該斯落氣咧！
注釋
1草鞋嫲: 音coˊ hai ma ; 一種毛毛蟲。
2襯頭 : 音cen+ teu ; 平衡。
