對客家人講笑 一息乜毋好笑
【文∕廖經庭∕國立中央大學客家社會研究所碩士】
新聞報導脫口秀演員龍龍分享男友个各種生趣事蹟，兩儕个諸多差異分佢頻頻「發癲」，影片發佈後，吸引高達上百萬點閱摎上千則留言還過分享，話題十足，毋過龍龍在社群媒體對客家人講笑，怕係分客家鄉親歡喜毋起來，乜該免加深族群負面意象摎刻板印象。
龍龍表示自家个男友係「當客家」个客家人，乜係「齧」到愛死，逐擺約會都平均分擔費用，少分十箍錢都會追著來，多付分佢就直接講「承蒙」收下，食冰淇淋都堅持「跌地泥下三秒以內都做得食」个準則，分佢大貶白眼。其實龍龍分享自家摎男友个生活點滴，十分幽默生趣，這乜毋係麼个壞事情，毋過硬硬強調男友个「客家族群」身分，就係拿客家族群來消費了，這就十分毋妥當了。
筆者身旁乜有毋少非客家族群，佢兜个生活方式乜十分「做家」，因此「做家」事實上並毋係客家人專屬个族群特色，毋過龍龍刻意強調男友个客家族群身分，就係嘲笑客家族群「齧」。
恐驚有部分人士會試著，龍龍个影片毋過係表達出輕鬆生趣个幽默，一切當做雲淡風輕笑笑就好，搞笑話認真就輸了，毋過聽在客家族群耳肚嗄斷真歡喜毋起來。盡高級个幽默係「自嘲」，毋過開他人搞笑嗄係無意著害了他人，龍龍身為公眾人物，毋可毋慎。
